د اتمر په مشرۍ افغان پلاوی اسلام اباد کې "پر قبایلو خبرې نه کوي"

د انځور حقوق @DrOmarZakhilwal
Image caption له حنیف اتمر سره په اوسني سفر کې د کورنیو او دفاع چارو وزیران او د ملي امنیت لوی مشر او نور اړوند چارواکي ملګري دي.

د افغانستان د ملي امنیت شورا د سلاکار په مشرۍ افغان پلاوی د یکشنبې په ورځ اسلام اباد ته لاړ، چې د دغه هېواد له چارواکو سره د سولې او پیوستون عمل پلان پر پلي کولو خبرې وکړي.

پاکستان ته د افغان پلاوي سفر په داسې مهال دی، چې د تېرې جمعې په ورځ د پاکستان سنا یا مشرانو جرګې او د پنجشنبې په ورځ ملي اسمبلۍ یا ولسي جرګې په خيبر پښتونخوا کې د قبايلي سيمو د ورګډولو لايحه منظوره کړه.

دغه لايحه به د يکشنبې په ورځ د خيبر پښتونخوا اسمبلۍ ته وړاندې کېږي.

د پاکستان دغه ګام افغان حکومت پارولی او ارګ د یوې اعلامیې خپرولو سره وايي، چې د قبایلي سیمو د حقوقي حالت د بدلولو په اړه د پاکستان د پارلمان وروستۍ پرېکړه یو اړخیزه او له برتانوي هند سره د افغانستان د ۱۹۲۱ کال د تړون مخالفه ده.

خو کله چې د بي بي سي خبریال نصرت صمیمي د ملي امنیت شورا ویاند قادر شاه وپوښت چې افغان پلاوی به له پاکستاني لوري سره پر دغه مسله خبرې وکړي په ځواب کې یې وویل، دا جلا مسله ده:

"دا دواړه یو مخ بېلې مسلې دي او دا سفر یواځې د سولې او پیوستون د عمل پلان لپاره ځانګړی شوی دی".

که څه هم د پښتونخوا ځینې ګوندونه له دغې صوبې سره د قبایلو د یو ځایولو ملاتړي دي، خو پښتونخوا کې ځینې سیاسي ډلې او همدارنګه ځینې قبایل د دې پرېکړې خلاف دي.

د ملي امنیت شورا ویاند دا هم وايي، چې افغان پلاوي په دې سفر کې د افغانستان، پاکستان او سیمې پرامنیت او ټیکاو خبرې کوي:

"د دې سند چوکاټ کې د سولې او ترهګرۍ سره د مبارزې لپاره د دواړو لورو چارواکي خبرې کوي او بیا به کتلی شي چې دا خبرې څنګه پلې کېږي".

د سولې او پیوستون عمل پلان

قادر شاه وايي، افغان پلاوي په دې سفر کې د سولې او پیوستون لپاره د افغان- پاک عمل پلان د سند د پلي کولو لپاره پر لوړه کچه پر هغو مسلو خبرې کوي، چې له څو میاشتو راهیسې پرې دواړو لورو بحث کاوه:

"افغانستان ته د پاکستان د لومړ ي وزیر د سفر پر مهال پر اوو اصولو هوکړه وشوه چې د هغو په چوکاټ کې به د دواړو هېوادونو ترمنځ په مختلفو کچو د مناسباتو لپاره چې په هغه کې به د سولې او پیوستون موضوع هم شامله وي هغه به عملي کېږي".

نوموړی زیاتوي، پاکستان ته افغان پلاوي څو ورځې مخکېني سفر کې هم د دې اوو اصولو پر پلي کولو عملي او تطبیقي پلان جوړ شو او دواړو لورو پرې هوکړه وکړه.

افغان پلاوي هغه سفر د روانې مۍ میاشتې پر پنځلسمه نېټه اسلام اباد ته درلود، چې په اړوند مسله څلورمه غونډه وه.

په هغه غونډه کې د افغان پلاوي مشري د بهرنیو چارو مرستیال وزیر حکمت خليل کرزي او د پاکستان غاړې مشري د بهرنیو چارو سکرترې تهمینه جنجوعه کوله.

له چا سره پر کومو مسلو خبرې؟

له حنیف اتمر سره په اوسني سفر کې د کورنیو او دفاع چارو وزیران او د ملي امنیت لوی مشر او نور اړوند چارواکي ملګري دي.

په اسلام اباد کې د افغان سفارت سرچینې وايي، د ملي امنیت سلاکار محمد حنیف اتمر په مشرۍ پلاوی به د پاکستان له لومړي وزیر ښاغلي عباسي سربېره د پوځ له مشر جنرال قمر جاوېد باجوه او د پاکستان د ملي امنیت له سلاکار ناصر خان جنجوعه سره وویني.

د سرچینې په خبره، افغان پلاوی به له پاکستاني چارواکو سره د افغانستان او پاکستان د سولې او یووالي اقدام د تېرو غونډو د هوکړو عملي کولو له خبرو سربېره د ځينو نورو مهمو دوه اړخیزو مسلو هم خبرې وکړي.

د ملي امنیت شورا ویاند قادرشاه په خبره، په اوسني سفر کې د سند پر عملي کولو د لوړې کچې بحث کېږي:

"په دې سفر کې به د دې سند پر پلي کولو د لوړې کچې خبرې وشي".

د عمل پلان ۷ اصول

د ملي امنیت شورا د سلاکار د ټوېټر له مخې، افغان ولسمشر د پاکستان له لومړي وزیر سره وروستۍ لیدنه کې د سولې او پیوستون لپاره د افغان- پاک عمل پلان پر لاندې اوو اصولو هوکړه کړې ده.

۱ - پاکستان د افغانانو په مشرۍ او افغانانو په ملکیت د سولې او پخلاینې ملاتړ کوي.

۲ - دواړه لوري د هغو فراریانو او نه پخلا کېدونکو عناصرو پرضد اغېزناک ګامونه پورته کوي چې یو د دغو هېوادونو امنیت ته ګواښ پېښوي.

۳ - دواړه لوري ژمن دي چې خپله خاوره به یې د کوم بل هېواد، شبکې، ډلې یا فرد له خوا د مقابل هېواد د حکومت ضد چارو لپاره نه کارېږي.

۴ - د توافق شویو اصولو د پلي کولو لپاره باید د اړیکو د مدیرانو له لارې د ارزونې او همغږۍ او تثبیت ګډ میکانیزم جوړ شي.

۵ - دواړه هېوادونه د یو بل سیمه کې د ځمکني او هوايي تاوتریخوالي مخنیوي ته ژمن دي.

۶ - دواړه لوري د عامه تورونو لوبې د مخنیوي او اندېښمنوونکو او جنجالي مسلو ته د ځواب ویلو لپاره د سولې او پیوستون لپاره د افغان- پاک عمل پلان (APAPPS) د همغږۍ میکانېزم کاروي.

۷ - د سولې او پیوستون لپاره د افغان - پاک عمل پلان د پلي کولو او د پورتنیو اصولو د پلي کولو لپاره کار ډلې او همغږۍ میکانیزم جوړوي.

اړونده مطالب

ورته مطالب