ننګرهار برید پای ته رسېدلی، ۱۱ کسان وژل شوي دي

ننګرهار د انځور حقوق Reuters
Image caption ځايي چارواکي وايي، بريدګر درې کسان وو، چې لومړی يې دوی په ډزو ويشتلی او دوو نورو يې ودانۍ ته له ننوتو وروسته ځانونه الوځولي دي.

د افغانستان د ختیځ ننګرهار ولايت په مرکز جلال آباد ښار کې د پوهنې په ښاري مديریت د وسله والو په ډله ییز بريد کې د دې ادارې د مشر او د څارنې د مدير په ګډون ۱۱ کارکوونکي وژل شوي او همدومره نور پکې ټپيان شوي.

د ننګرهار والي ویاند عطاالله خوګیاڼي، بي بي سي ته وویل، د ورځې نژدې یوه بجه د دوو بریدګرو له وژل کېدو سره برید پای ته ورسېد. نوموړي زیاته کړه:

''دغه برید کې د مدیر په ګډون د معارف ۱۱ کارکوونکي شهیدان شوي دي. ۱۱ نور کسان ټپیان شوي دي، چې پینځه د معارف کارکوونکي دي، ۳ امینتي کسان دي او دوه لاروي او یو هم د ښوونځي زده کوونکی دی. ''

د برید پر مهال ودانۍ کې ګڼ شمېر کارکوونکي او مراجعین ایسار پاتې وو. د عملیاتو له پای ته رسېدو وروسته ۲۰ کسان له ودانۍ بهر کړل شول. عیني شاهدان وايي، د دوو زورورو چاودونو غږونه یې اورېدلي دي.

له دغه بریده چې څلور ساعته یې دوام وکړ، د پوهنې ریاست شل نور کارکونکي روغ وتلي.

بريد سهار په ځايي وخت ۹:۳۰ دقیقې د ښار په پنځمه ناحيه کې د پوهنې د ښاري مديريت پر ودانۍ هغه مهال پیل شول چې د یادې ادارې کارکونکي په کار بوخت وو.

د پېښې عيني شاهدانو بي بي سي ته ويلي، بريدګر په کرولا ډوله موټر کې سيمې ته راغلي وو.

ننګرهار کې ځانمرګي برید ۱۴ کسانو ته مرګ ژوبله اړولې

ننګرهار: د داعش وسله والو مرکز ورانولو ادعا شوې

ننګرهار: د والي دفتر مخې ته ځانمرګي بريد لږ ترلږه ۱۹ کسان وژلي

ارګ او ملګرو ملتونو دا بريد غندلی دی.

سملاسي د بريد مسووليت کومې ډلې نه دی منلی. کابو مياشت وړاندې هم دريو ځانمرګو بريدګرو د پوهنې رياست پر ودانۍ برید کړی و، چې یو پولیس یې وژلی و.

هغه مهال د برید مسولیت اسلامي دولت نومې وسله‌والې ډلې یا داعش منلی و.

دا په تېرو دوو اونيو کې درېيمه خونړۍ پېښه ده، چې په دې ښار کې د ګڼو کسانو ژوند اخلي.

د تېرې اونۍ په سر کې ننګرهار ته د ولسمشر د سفر په ورځ د اسلامي دولت نومي ډلې داعش سېک او هندو لږکيان په نښه کړل او پرون د دغه ښار په شپږمه ناحيه کې د پوليسو د پلټنې پر يوه پوسته هم د ځانمرګي بريد مسووليت داعش ومانه چې په کې د ملي امنيت د دوو کارکوونکو په ګډون ۱۲ تنه ووژل شول.

په ننګرهار کې د داعش وسله والو پر پټن‌ځایونو د افغان دولت او بهرنیو ځواکونو د عملياتو په تېزېدو سره په دغه ښار د داعش وسله والو بريدونه هم ډېر شوي دي.

ورته مطالب