مصر کې د تابوت سپړلو سره ګنګوسې هم ختمې شوې؟

د انځور حقوق Reuters

د مصر اسکندریه ښار کې دوه اونۍ وړاندې د ودانۍ جوړولو پر مهال داسې تابوت وموندل شو چې له دوو زرو کلونو لاس نا خوړلی پاتې دی.

چارواکي وايي دا تابوت دیرش ټنه وزن لري.

دوی د دې تابوت د سپړلو هڅه کوله، چې اوازې ګډې شوې دا تابوت به د لوی سیکندر وي.

خو د تابوت له پرانستلو وروسته د مصر د لرغونو اثارو د عالي شورا مشر مصطفی وزیر وویل دا تابوت د سیکندر نه دی:

"د تابوت نښې نښانې هم ښيي چې دا د کوم پاچا تابوت نه دی".

د نوموړي په خبره، په دې تابوت کې ښکاري چې د یوه پوځي مړی ساتل شوی او ور سره دوه نور کسان ښايي د ده ملګري او یا هم د ده د کورنۍ غړي وي.

"په یوه کوپړۍ کې سوري ښکاري چې ښايي په غشي لګیدلې وي".

د انځور حقوق Reuters
Image caption د تابوت پرانیستلو سره سیمه بد بوي ونیوله.

دا چې ولې درې مړي په یوه تابوت کې ایښودل شوي ښاغلي وزیر وویل اټکل دا دی چې په تابوت کې مړي په تلوار اېښودل شوي او یا ښايي کومه بله پېښه وه چې د دې کار لامل شوې ده.

د تابوت د پرانیستلو پرمهال هغې سور رنګه مایع څيړونکي حیران کړل چې له تابوت راووتل او ډیر بدبوی یې درلود.

خو وروسته معلومه شوه چې د وخت په تېریدو سره د ښاري کانالیزاسیون اوبه ورغلې او له همدې امله د جسدونو مومیا له منځه تللې او یوازې تش هډوکي پاتې دي.

اټکل دی چې دا تابوت بتلمي تاریخي دورې پورې تړاو لري.

دا دوره له میلاد ۳۲۳ کاله وړاندې د لوی سیکندر له وفات وروسته پيلیږي.

د انځور حقوق Reuters
Image caption دا نږدې درې متره لوړ ډبرین تابوت تر دېرش ټنو وزن لري.

اړونده مطالب