'د حمل ۳۱مه افغانستان کې د ولسمشرۍ ټاکنو ورځ'

افغانستان د انځور حقوق Getty Images

د ټاکنو خپلواک کمیسیون یوه سرچينه وایي، دوی به سبا (چهارشنبه) په رسمي ډول د ولسمشریزو ټاکنو مهالوېش اعلان کړي. له دې مخکې څو ځله ولسمشر محمد اشرف غني له دې کمیسیونه غوښتي و چې ژر تر ژره د ټاکنو نېټه اعلان کړي.

د ټاکنو خپلواک کمیسیون هوډ کړی چې نهه میاشتې وروسته د ۱۳۹۸ لمریز کال د وري په یودېرشمه چې د ۲۰۱۹ کال د اپرېل شلمه نېټه کېږي، ولسمشریزې او د ولایتي شوراګانو ټاکنې وکړي.

د دغه کمیسیون د ویاند مرستیال عزیز ابراهیمي وایي، دوی د حکومت په غوښتنه د ټاکنو د مهال وېش طرحه بشپړه کړې ده.

نوموړی زیاتوي، له سیاسي ګوندونو، مدني ټولنو او څارونکو بنسټونو سره د دوی په یوه غونډه کې پرېکړه شوې چې ولسمشریزې ټاکنې راتلونکي پسرلي کې وشي.

"ولسمشریزې ټاکنې به له اساسي قانون سره سمې یو کال وروسته کېږي"

ټاکنو کمېسیون: یوازې په اصلي تذکرو د رایه ور کوونکو نوملیکنه اعتبار لري

بل لور ته د کمیسیون یوې سرچینې د نوم نه ښودو په شرط ویلي، د وري میاشتې ۳۱ مه د ټاکنو ورځ په ګوته شوې ده.

دغه سرچینه زیاتوي دوی به سبا چهارشنبه په یوه غونډه کې د ټاکنو مهال وېش رسماً اعلان کړي.

د انځور حقوق Getty Images
Image caption ولسمشریزو ټاکنو ته تراوسه ولسمشر غني داسې ښودلې چې کاندید به وي

ولسمشریزو ټاکنو ته تراوسه ولسمشر غني په نامستقیمه توګه د نوماندۍ خبره کړې.

څو ورځې وړاندې د حکومت سیاسي مخالفینو د همدې ټاکنو لپاره یوه ټلواله هم جوړه کړه، چې ډېر غړي یې د یو شمېر سیاسي ګوندونو مشران وو.

د ولسمشریزو ټاکنو د نېټې یادونه په داسې حال کې کېږي چې افغانستان نژدې درې میاشتې وروسته د تلې پر اته ویشتمه د ولسي جرګې او ولسوالیو شوراګانې ټاکنې په مخ کې لري.

ناامنۍ او د بودیجې کموالی دغو ټاکنو ته د لویو ننګونو په توګه یادېږي.

اړونده مطالب