نیکولسن: افغانستان کې د سولې او پخلاینې چانس ډېر شوی

  • سمیع الله موسی‌زی
  • بي بي سي، لندن
v

د عکس سرچینه، Getty Images

د عکس تشریح،

نیکولسن د ټرمپ ستراتیژي هم بریالۍ بولي او وايي د دې ستراتیژۍ وروسته طالبانو سره خبرو کې پرمختګ شوی دی.

جنرال جان نیکولسن چې د ویډیو کانفرانس له لارې یې له کابل په واشنګټن کې خبریالانو سره خبرې کولې د افغان حکومت او طالبانو ترمنځ د سولې د روانو هڅو پایلو ته هیله من ښکاریده.

هغه ویلي اوس تر بل هر وخت په افغانستان کې د سولې او پخلاینې لپاره چانس ډیر شوی دی.

د هغه په خبره، سره له دې چې جګړه سخته شوې ، خو د سولې او پخلاینې په برخه کې داسې پرمختګ ویني چې له دې وړاندې یې ساری نه دی لیدل شوی:

"کله چې د سولې بهیر پیل شي نو دا به په افغانستان کې د اوږدې مودې جګړې په تړاو یوه ښه لاسته راوړنه وي او له طالبانو سره د روغې جوړې په پيلیدو د جګړې میدان هم سړیږي".

د هغه په اند، دا بدلون نه یوازې د افغانانو لپاره چې کلونه جګړې کړولي یو ښه چاپيریال رامنځته کوي:

"بلکې له موږ سره هم مرسته کوي چې له دوی سره په ګډه پر ترهګرو فشار ته دوام ورکړو ترڅو دوی و نه شي کولی امریکا او نور ملګري هېوادونه وګواښي".

له پاکستان اندېښنه

د عکس تشریح،

د امریکايي ځواکونو قومندان وايي دې خبرې اندېښمن کړی چې د طالبانو درملنه د پاکستان روغتونونو کې کېږي.

په افغانستان کې د ناټو او امریکايي ځواکونو قوماندان جنرال جان نیکولسن دغه راز د افغانستان او سویلي اسیا لپاره د امریکا د کړنلارې په اړه وویل دا ستراتیژي بریالۍ ده.

د ده په وینا، د دې ستراتیژۍ یو اساسي ټکی پر سیاسي روغه جوړه ټینګار دی او په دې برخه کې شوی پرمختګ او د سولې هڅو ته د طالبانو غبرګون د دې ستراتیژۍ د بریالیتوب په معنی دی.

په پاکستان کې د طالبانو د مرکزونو په تړاو د یوې پوښتنې په ځواب کې ښاغلي نیکولس وویل دې اندیښمن کړی چې د طالبانو د ټپیانو درمنله د پاکستان په روغتونو کې کیږي، خو د افغانستان او پاکستان ترمنځ د همغږۍ پایلو ته هیله من دی.

د افغانانو په مشرۍ خبرې

د عکس سرچینه، Getty Images

د عکس تشریح،

د طالبانو استازو هم په دې وروستیو کې ازبکستان او اندونیزیا ته سفر درلود. انځور پخوانی دی.

د سولې او پخلاینې په تړاو د دغه امریکايي جنرال دا خبرې په داسې مهال دي چې ویل کېږي تېره میاشت د امریکا د بهرنیو چارو وزارت مرستیالې په قطر کې له طالبانو سره خبرې کړې.

طالبانو له کلونو راهیسې د افغان حکومت پر ځای له امریکا سره خبرې کول غوښتل او دا وروستۍ لیدنه د دې ډلې په تړاو د واشنګټن دریځ کې بدلون بلل کېږي.

خو ښاغلي نیکولسن ټینکار وکړ چې د افغانستان د سیاسي راتلونکي په اړه هر ډول خبرې باید د افغانانو په مشرۍ او د افغانانو ترمنځ وي:

د امریکا رول به د ده په وینا دا وي چې دا ډول خبرو ته لاره هواره کړي او په دې تړاو سلامشورو کې برخه واخلي.

د مسکو غونډه کې د افغانانو نه ګډون

د عکس سرچینه، Reuters

د عکس تشریح،

روسیه وايي، طالبان د مسکو غونډه کې ګډون کوي، خو افغان حکومت وايي د سولې داسې خبرو ته نه ورځي چې مشري یې د افغانانو لاس کې نه وي.

له بلې خوا د افغانستان د بهرنیو چارو وزارت ویاند صبغت الله احمدي بي بي سي ته وویل، چې افغان حکومت د مسکو غونډه کې ګډون نه کوي.

د ښاغلي احمدي په خبره، افغان حکومت د سولې خبرو په داسې غونډه کې ګډون کوي چې مشري یې د افغانانو په لاس کې وي.

د کابل دا غبرګون له هغه وروسته دی چې د روسیې د بهرنیو چارو وزیر وویل، مسکو کې د افغان سولې په تړاو غونډه جوړېږي او د طالبانو استازي هم ورځي.

دا غونډه راتلونکی سپټمبر جوړېږي.

امریکا لا د مخه ویلي چې دغې غونډې ته به کوم استازی ونه لېږي.

د روسیې د بهرنیو چارو وزارت اعلامیه وايي، دوی د امریکا پر دې پرېکړه حیران نه دي.

واشنګټن تر دې وړاندې په ۲۰۱۷ کال کې هم دې ته ورته یوه غونډه کې له ګډونه انکار کړی و.