طالبانو د مسکو غونډې لپاره پلاوی ټاکلی

طالبان د انځور حقوق Getty Images
Image caption طالبان وایي، د مسکو په غونډه کې به ګډون کوي

افغان طالبانو بي ب ي سي ته منلې ده چې راتلونکې میاشت په مسکو کې د افغانستان د سولې په تړاو جوړېدونکې غونډه کې ګډون کوي او دې ناستې لپاره یې یو پلاوی هم ټاکلی.

ټاکل شوې ده چې یاده غونډه د سپتمبر میاشتې پر څلورمه نېټه جوړه شي.

د طالبانو ویاند ذبیح الله مجاهد بي بي سي ته ویلي، په قطر کې د طالبانو د سیاسي دفتر مشر شېر محمد عباس ستانکزی به د مسکو ناسته کې د طالبانو د پلاوي مشري کوي.

نوموړي د پلاوي د نورو غړو په اړه مالومات ور نه کړل، خو زیاته یې کړه چې د روسیې د بهرنیو چارو وزارت دوی ته په دې ناسته کې د ګډون بلنه ورکړې او دوی منلې ده.

طالبان له مسکو غونډې څه موخې لري

د انځور حقوق AFGHAN MoFA
Image caption د افغانستان د بهرنیو چارو وزارت وایي د خبرو مشري باید افغانان وکړي

د طالبانو ویاند ذبیح الله مجاهد وايي، په دې غونډه کې د دوی د پلاوي د ګډون موخه دا ده چې د سیمې هېوادونه د افغانستان د قضیې په تړاو د طالبانو اسلامي امارت له دریځه خبر شي.

نوموړي ټیګار وکړ چې دا غونډه یوازې د خپلمنځي تفاهم لپاره ده او هېڅ ډول پرېکړې به پکې نه کېږي.

د هغه په وینا، دا اړینه ده چې د ناستې ګډونوال د د افغانستان د قضیې په اړه د طالبانو له دریځه خبر وي او د دوی پلاوی به دا چاره ترسره کوي.

د یادولو ده چې نږدې تېرو دوو اونیو کې د وسلوالو طالبانو یو پلاوی د عباس ستانکزي په مشرۍ ازبکستان او اندونیزیا ته هم تللی او د هغو هېوادونو له چارواکو سره یې لیدلي دي.

افغان حکومت ګډون نه کوي

د انځور حقوق Getty Images
Image caption د روسیې د بهرنیو چارو وزیر پرون وویل، چې طالبان د مسکو غونډې ته ورځي.

یاده دې وي چې افغان حکومت تېره ورځ اعلان وکړ چې په دې ناسته کې ګډون نه کوي.

د بهرنیو چارو وزارت تېره ورځ ټینګار وکړ چې د سولې په تړاو د هر ډول خبرو مشري باید د افغانانو په لاس کې وي.

تر دې وړاندې د امریکا حکومت هم اعلان کړی و چې د مسکو په ناسته کې ګډون نه کوي.

د روسیې د بهرنیو چارو وزارت په دې غونډه کې د امریکا د نه ګډون پرېکړه وغندله.

دغه وزارت تور پورې کړ چې واشنګټن یوازې په هغو ناستو کې ګډون کوي چې مشري یې له دوی سره وي او د امریکا ګټې پکې خوندي وي.

ویل کېږي چې د څلورم سپتمبر په ناسته کې به پر روسیې سربېره د چین، ایران، پاکستان، هند او د منځنۍ اسیا د پنځو هېوادونو استازي ګډون کوي.

ورته مطالب