هلمند: د ټاکنو نوماند او ۸ پلویان یې په ځانمرګي برید کې وژل شوي دي

اڅکزی
Image caption نوماند صالح محمد اڅکزی هم په دې ځانمرګي برید کې وژل شوی

د هلمند ولایت په مرکز لښکرګاه کې یوه ځانمرګي برید د راتلونکو پارلماني ټاکنو نوماند صالح محمد اڅکزی او د هغه ۸ تنه پلویان وژلي دي. د هلمند د والي ویاند عمر ځواک د ښاغلي اڅکزي د وژل کېدو خبر تائید کړی.

ویل کېږي چې په دې برید کې ۱۱ نور کسان ټپیان شوي هم دي.

ښاغلي ځواک بي بي سي ته وویل، کېدای شي د دغه د ځانمرګي بريد له امله د اوښتې مرګژوبلې شمېر نور هم لوړ شي.

د هلمند امنیې قومندان سلام افغان بي بي سي ته وویل، پېښه له ځايي مهال سره سم ماسپښین نژدې دوې نیمې بجې شوې.

د عیني شاهدانو په وینا، ځانمرګي بریدګر د یو عادي کس په بڼه د ښاغلي اڅکزي ټاکنیز کمپاین دفتر ته ننوت او هلته یې برید وکړ.

د یوناما غبرګون

په افغانستان کې د ملګرو ملتونو مرستندویه دفتر - یوناما په یوه خبرپاڼه کې د هلمند ځانمرګي برید کې د صلاح محمد اڅکزي پر وژل کېدو ژوره خواشیني ښودلې ده.

ښاغلی اڅکزی له هلمنده په ولسي جرګه کې ددغه ولایت اتو څوکیو ته کاندید شوی و.

د انځور حقوق Helmand Governor's Office
Image caption ویل کېږي چې برید د ښاغلي اڅکزي پر دفتر شوی ‍

د وژل شوي نوماند صالح محمد اڅکزي په اړه ویل کېږي چې دا یې لومړی ځل و چې ټاکنو ته نوماند و.

نوموړی یو سوداګر و، واده یې کړی و او دوه زامن لري.

څو ورځې وړاندې د ننګرهار په کامې ولسوالۍ کې هم د راتلونکو پارلماني ټاکنو د یوه نوماند پر کمپاین غونډه ځانمرګی برید شوی و، چې ۱۴ کسان پکې وژل شوي وو.

په افغانستان کې اوسنی امنیتي وضعیت د راتلونکو ټاکنو پر وړاندې یوه لویه ننګونه ده.

دا په داسې حال کې ده چې د افغان حکومت ترڅنګ په افغانستان کې ميشتو نړیوالو ځواکونو هم ژمنه کړې چې د ټاکنو په امنیت کې به د افغان ځواکونو مرسته کوي.

پارلماني ټاکنې به د تلې میاشتې پر ۲۸مه نېټه ترسره کېږي، چې د ولسي جرګې د ۲۵۰ څوکیو لپاره به له ټول هېواده کابو ۲۵۰۰ نوماندان پکې ګډون کوي.

ورته مطالب