"د سرتېرو اېستل؛ د افغان-امریکا جګړې د پای ته رسولو لومړی عملي ګام"

د انځور حقوق Getty Images
Image caption ځینې رسنۍ وايي، امریکا تر اوو زرو سرتېري له افغانستان باسي.

نړیوالو او په تیره امریکايي ورځپاڼو او خپرونو له افغانستان د امریکايي ځواکونو د وتلو په اړه د امریکا د ولسمشر ډونلډ ټرمپ د احتمالي پریکړې په اړه ډیر مطالب خپاره کړي دي.

له دې ډلې نیویارک ټایمز ورځپاڼه له افغانستان د امریکايي ځواکونو د وتلو په اړه لیکي د ډونلډ ټرمپ اداره په پام کې لري چې په راتلونکو څو میاشتو کې شاوخوا اوه زره سرتیري له افغانستان را وباسي.

نیویارک ټایمز لیکي که له افغانستان د امریکايي سرتیرو د وتلو پریکړه وشي نو دا به په افغانستان کې د امریکا د اولس کلنې جګړې د پای ته رسولو لپاره لومړی عملي ګام وي.

دا ورځپاڼه لیکي د دې ګام په پورته کولو سره هڅه کیږي چې افغانستان د بهرنیو ځواکونو پرتله تر ډیره پر خپلو ځواکونو تکیه شي.

واشنګټن ایکزامینر لیکلي د امریکا په حکومت کې داسې ویره شته چې ښايي ولسمشر ډونلډ ټرمپ له افغانستان د بهرنیو ځواکونو د پیل په اړه په نږدې راتلونکي کې پریکړه وکړي.

امریکا ته د احتیاط غوښتنه

د انځور حقوق Reuters
Image caption له زلمي خلیلزاد سره خبرو کې طالب پلاوي هم د امریکاېي ځواکونو د وتلو غوښتنه کړې ده.

دې خپرونې په افغانستان کې د امریکايي او ناټو ځواکونو د پخواني قوماندان متقاعد جنرال جان الن څرګندونو ته اشاره کړې چې وايي له افغانستان د ځواکونو ویستل یوه ډیره حساسه مسله ده او که داسې وشي نو دا به د امریکا لپاره یوه لویه ستونزه وي.

د ده په وینا افغانانو پر امریکایانو اعتماد کړی چې د یوه باور وړ نظام په جوړولو کې له دوی سره مرسته وکړي:

یوازې د ځواکونو د وتلو اعلان په اوسنۍ ستراتیژۍ کې یو ډول کړکیچ رامنځته کوي.

د ده په وینا امریکا ته پکار دي چې په دې اړه ډیر، ډیر احتیاط وکړي چې دا پریکړه څه ډول اعلان کړي.

ډان ورځپاڼه لیکي که د امریکا ولسمشر له افغانستان د خپلو ځواکونو د وېستلو په اړه هر ډول پرېکړه کوي نو دا امرېکا پورې اړه لري ، خو د پاکستان ګټه په دې کې ده چې په افغانستان کې د تل پاتې سولې لپاره کار وکړي.

د اسلامي دولت د بیا ځواکمنېدو وېره

د انځور حقوق AFP
Image caption سوریه کې امریکا نږدې دوه زره سرتېري لري.

اینډیپنډینټ ورځپاڼه لیکي له سوریې د امریکايي ځواکونو ناببره په شا کېدل ښايي هغه څه وي چې اسلامي دولت نومې ډله یې هیله لري.

د دې مطلب لیکوال وايي یاده ډله غواړي داسې شرایط رامنځته شي چې دوی پکې یو ځل بیا وده وکړي او شونې ده چې دا شرایط له سوریې د امریکا په وتلو سره رامنځته شي.

که ترکیه د عراق پر شمال برید وکړي میلیونه کسان به کډوال شي او د کردانو او عربانو ترمنځ به شخړه رامنځته شي او اسلامي دولت ډله په همدا ډول یوه وضعیت کې رامنځته شوه او وده یې وکړه.