روسیه وايي، افغان ټاکنې د امریکا د 'فشار' له کبله ځنډول شوې

روسیه د انځور حقوق AFP
Image caption د روسیې بهرنیو چارو وزارت وايي، ''ټاکنې د امریکا د فشار له کبله ځنډېدلي ځکه چې افغانستان کې د خپلې خوښې سیناریو لپاره وخت ته اړتیا لري.''

کابل کې د امریکا متحدو ایالتونو د روسیې بهرنیو چارو وزارت هغه څرګندونې رد کړې، چې ګواکې د افغانستان ولسمشرۍ ټاکنې د امریکايي 'فشار ' له کبله ځنډول شوې دي.

د امریکا سفارت دغه ځنډ د افغانستان د ټاکنو خپلواک کمېسییون پرېکړه بولي. پرون 'پنجشنبه ' د روسیې بهرنیو چارو وزارت په تونده لهجه د افغانستان ولسمشریزو ټاکنو پر ځنډ نیوکه وکړه د وزارت په وینا:

''ټاکنې د امریکا د فشار له کبله ځنډېدلي ځکه چې افغانستان کې د خپلې خوښې سیناریو لپاره وخت ته اړتیا لري. ''

د افغانستان ټاکنو خپلواک کمیسیون لس ورځې مخکې اعلان وکړ، چې د (اصلاحاتو او ګټورتیا) لپاره یې د افغانستان ولسمشرۍ ټاکنې درې میاشتې ځنډولې دي.

افغان ولسمشرۍ ټاکنې ۳ میاشتې وځنډېدې

افغان ولسمشرۍ ټاکنې؛ ولې یې پر ځنډولو غور کېږي؟

د مخکیني پلان له مخې به د افغانستان ولسمشریزې ټاکنې د راتلونکي کال د وري میاشتې پر ۳۱ کېدې، خو د نوي تقسیم الاوقات له مخې به اوس دغه ټاکنې د راتلونکي کال د چنګاښ میاشتې پر ۲۹ کېږي.

د روسیې بهرنیو چارو وزارت په اعلامیه کې ویل شوي:

''سره له دې چې د افغان ولسمشر محمد اشرف غني او د ټاکنو خپلواک کمیسیون په ټینګار ویل چې ټاکنې به پر ټاکلي مهال کېږي، خو بیا وروستۍ پرېکړه دا شوه، چې وځنډیږي. هر څه ښيي چې دا پرېکړه د امریکا د فشار له کبله ده چې غواړي ټاکنې یې د خوښې وړ وي او د دغه هېواد د سولې بهیر سیناریو هم له خپلې خوښې سره سم ډیزاین یا طرح کړي. ''

د امریکا متحدو ایالتونو سفارت د روسیې په ځواب کې نن وویل:

''د افغان ولسمشریزو ټاکنو ځنډولو پرېکړه د افغانستان ټاکنو کمیسون د دې لپاره کړې چې تېرو ټاکنو کې رامنځته شوې نیمګړتیاوې او فني ستونزې له منځ یوسي. ''

په اعلامیه کې ویل شوي:

''د ډېرو افغانانو او نړیوالې ټولنې په څېر امریکا هم په ټاکنو کې جدي اصلاحات مهم بولي. ''

د افغانستان ولسمشریزو ټاکنو لپاره د کاندیدانو د نوم لیکنې بهیر د مرغومي میاشتې له لومړۍ نېټې پیل شوې او د دغې میاشتې تر پایه به روانه وي.