افغان ټاکنې: د کابل ولسي جرګې ټاکنو لومړنۍ پایلې اعلان شوې

د انځور حقوق Getty Images

د افغانستان د ټاکنو خپلواک کمېسیون تر اوږده ځنډ وروسته، نن (دوشنبه) د کابل حوزې د پارلماني ټاکنو ابتدايي پایلې اعلان کړې. د لومړنیو پایلو له مخې، په بریالیو کاندیدانو کې ترډېره نوې څېرې لیدل کېږي.

کابل چې په افغانستان کې ترټولو ډېر نفوس لرونکی ولایت دی، په ولسي جرګه کې ۳۳ څوکۍ لري چې لس یې ښځو ته ځانګړې شوي.

د ابتدایي پایلو تر اعلانېدو وړاندې، د پراخو درغلیو له امله کابل کې د لسګونو مرکزونو رایې له سره وشمېرل شوې. خو د ټاکنیزو شکایتونو کمیسیون وایي؛ لا هم دغه بیا شمېرنه د دوی د قناعت وړ نه دی ګرځېدلی.

کابل کې له اتو سوو ډېرو کاندیدانو د ولسي جرګې څوکۍ ترلاسه کولو لپاره سره سیالي وکړه.

د ټاکنو کمېسیون رییس عبدالبدیع صیاد تخنیکي ستونزې او د دغې ادارې په کار کې لاسوهنه د کابل پارلماني ټاکنو د پایلو په اعلان کې د ځنډ لاملونه یاد کړل.

د ابتدایي پایلو له مخې، نوي څېرې توانېدلي پارلمان ته لاره ومومي او ترډېره پانګوال او ځوانان د نوملړ په سر کې دي.

کابل کې د ګټونکو کاندیدانو نومونه، ۲۴ نارینه، ۹ ښځینه د رایو شمېر
اجمل رحماني ۱۲۱۹۲
عبدالقیوم خیرخواه ۹۶۲۶
فدا محمد الفت صالح ۷۴۰۶
احمد جاوید جیهون ۷۱۶۱
رمضان بشردوست ۷۰۴۱
خان آغا رضايي ۶۹۰۵
امیرګل شاهین ۶۷۶۵
غلام حسین ناصري ۶۴۷۰
ملامحمد خان احمدي ۶۳۴۸
الله ګل مجاهد ۶۳۳۳
سید محمد محمدي ۶۲۵۳
میرامان الله ګذر ۶۲۵۰
خان محمد وردګ ۶۰۰۵
قاضي میرافغان ساپی ۵۹۶۸
اجمل ګلاب ۴۵۲۵
احمد ضیا عظیمي شینوزاده ۴۴۸۱
توفیق وحدت ۴۳۱۸
عبیدالله کلیمزی وردګ ۴۲۹۱
حفیظ الله جلیلي ۴۱۸۳
محمد فرهاد صدیقي ۴۱۷۴
انورخان اوریاخېل ۴۱۲۰
زړګی حبیبي ۳۹۳۸
حبیب الرحمن سیاف ۳۸۷۹
نجیب الله ناصر ۳۷۷۹
فاطمه نظري ۲۸۹۷
شینکۍ کړوخېل ۱۸۸۳
روبینا جلالي ۱۵۲۹
فوزیه ناصریار ګلدره يي ۱۴۷۰
مریم سما ۱۴۳۹
سلیمه نیکبین ۱۳۵۲
مرسل نبی زاده ۱۳۱۹
زهره نوروزي ۱۲۹۷
جنرال نظیفه ذکي ۱۱۹۷

د کوچیانو له دوو حوزو چې ځانګړې څوکۍ لري ټولټال ۱۰ څوکۍ دي چې اووه یې د نارینه و او درې يې د ښځینه و لپاره دي.

د کوچیانو د ګټونکو کاندیدانو نومونه د رایو شمېر
شاه وزیر تره خېل ۲۱۷۳۸
حبیب الرحمن افغان ۵۱۴۸
میرویس حسین خېل ۴۶۷۱
ننګیالی لونګ ۴۱۴۷
حاجي پرویز عربزاده ۳۶۲۹
حیدرجان نعیمزوی ۳۲۷۰
رسول خان کوچی ۲۸۵۳
حمیده احمدزۍ ۱۹۴۰
مریم سلیمانخېل ۸۳۹
فرزانه کوچۍ ۷۹۸

ښاغلي صیاد وویل دا لومړنۍ پایلې دي او له نوماندانو یې وغوښتل چې که شکایت لري تر ۴۸ ساعتونو دې یې ثبت کړي.

همدارنګه ښاغلي صیاد زیاته کړه چې کېدای شي د دې اوونۍ ترپایه او یا هم د بلې اوونۍ په پیل کې د نهو ولایتونو وروستۍ پایلې اعلان شي.

کابل چې د افغانستان ترټولو ګڼ میشتی ولایت دی، په پارلمان کې ۳۳ څوکۍ لري چې نهه یې ښځو ته ځانګړي شوي. د کابل پارلماني ټاکنې چې د نورو ولایتونو په پرخلاف دویمې ورځې ته وغځېدې، له جدي تخنیکي ستونزو او مدیریتي نیمګړتیاوو سره ترسره شوې.

د انځور حقوق Social Media

د ټاکنیزو شکایتونو کمېسیون د پراخو درغلیو، سرغړونو او ټاکنیزو جرمونو له امله یو ځل د کابل ټولې رایې باطلې اعلان کړې، خو وروسته یې په مشروط ډول پر خپلې پرېکړې د بیا کتنې ژمنه وکړه.

ددغه کمیسیون ویاند علي رضا روحاني بي بي سي ته وویل؛ د ټاکنو کمیسیون هغسې چې ژمنه کړې وه د رایو بیا شمېرنې لپاره لازم اسناد ددوی په واک کې ورنه کړل.

د ټاکنو د مهالویش له مخې باید د پارلماني ټاکنو وروستۍ پایلې باید پنځوس ورځې وړاندې اعلان شوې وای.

خو په وار وار د مهالویش ماتول د ټاکنو د کورنیو او نړیوالو څارونکو ادارو او آن د حکومتي مشرانو له توندو نیوکو سره مل و.

پرون د ولسمشر دویم مرستیال د ټاکنو کمیسیون پر قانون ماتونې تورن کړ او نن د حکومت اجراییه رییس عبدالله عبدالله په پېغور سره وویل که د افغانستان نفوس د چین برابر وای نو د ټاکنو پایلې به د قیامت په ورځ اعلانېدې.

ورته مطالب