د افغانستان ولسمشرۍ ټاکنې؛ څوک د ولسمشر کېدو خوب ویني؟

د انځور حقوق Social Media
Image caption ۱۸ نوماندانو خپل نومونه د افغانستان راتلونکو ولسمشرۍ ټاکنو لپاره ثبت کړي دي.

افغانستان کې د ۱۳۹۸ ولسمشرۍ ټاکنو لپاره د نوملیکنې وروستۍ ورځ تېره یکشنبه (مرغومي ۳۰مه/ جنوري ۲۰مه) وه.

۱۸ نوماندانو خپل نومونه د سیالۍ لپاره ثبت کړل. ټاکل شوې د افغانستان ولسمشرۍ ټاکنې راتلونکی لمریز کال د سرطان یا چنګاښ په ۲۹ مه نېټه ترسره شي. د ولسمشرۍ د نوماندانو لومړنی لیست به د سلواغې په ۱۶مه او وروستی نوملړ به یې د شکایتونو له ارزولو وروسته د وري په ۶مه خپور شي.

افغانستان کې لاندې کسانو ولمسشرۍ ته ځانونونه نوماند کړي.

محمد اشرف غني

محمد اشرف غني د افغانستان اوسنی ولسمشر د شاه جان احمدزي زوی دی. د ۱۳۲۸ لمريز کال د غويي مياشت کې يې په پلازمېنه کابل کې نړۍ ته سترگې غړولې دي. نوموړی د افغانستان سویلي ولایت لوګر دی.

محمد اشرف غني د "دولت جوړونکی" ټاکنیز شعار په غوره کولو امرالله صالح د زرغون بهیر مشر او د افغانستان د کورنیو چارو پخوانی وزیر لومړی مرستیال او سرور دانش یوځل بیا د دویم معاون په توګه ټاکلي دي.

محمد اشرف غني د ولسمشر کرزي په دویمه دوره کې له بهرنيو ځواکونو افغان ځواکونو ته د امنيتي مسووليت د لېږد د بهير مشر وټاکل شو. ښاغلي غني د افغانستان د ۲۰۰۹ کال په ټاکنو کې هم ځان ولسمشرۍ ته نوماند کړی و، خو چانس ورسره ياري ونه کړه. اشرف غني د ۱۳۹۳ کال ولسمشریزو ټاکنو کې د جنبش د ګوند مشرعبدالرشید دوستم او د افغانستان د عدليې پخوانی وزیر سرور دانش خپل مرستيالان غوره کړي و چې په دې ټاکنو کې نوموړی د افغانستان ولمسشر وټاکل شو. اشرف غني د ریاستي نظام پلوی دی. د ۱۳۹۸ کال لپاره ښاغلي غني یوځل بیا ولمسشرۍ ته ځان نوماند کړ.

لوړې زده کړې یې په لبنان او امریکا کې کړي دي او د امریکا په یو شمیر پوهنتونو کې استاد پاتې شوی. د وگړپوهنې په څانگه کې د امريکا د کولمبيا له پوهنتون نه دوکتورا ترلاسه کړې ده.

د انځور حقوق Social Media
Image caption محمد اشرف غني امرالله صالح د لومړي مرستیال او سرور دانش یوځل بیا د دویم معاون په توګه ټاکلي دي.

عبدالله عبدالله

د افغان حکومت اوسنی اجرایه مشر عبدالله عبدالله یوځل بیا ولسمشرۍ ته ځان نوماند کړی.

نوموړی د غلام محي الدین خان زمریاني زوی دی چې په ۱۳۳۸ لمریز کال یې کابل کې نړۍ ته سترګې غړولي. د کابل طب پوهنتون یې لوستی.

د "ثبات او همپالنې" شعار په غوره کولو د هغه لومړی معاون عنایت الله بابر فرهمند د جنبش اسلامي ګوند استازی او دویم مرستیال یې اسدالله سعادتي د اسلامي وحدت ګوند استازی دی.

عبدالله عبدالله په ۱۳۸۸ کال کې د ولسمشریزو ټاکنو نوماندۍ ته هم درېدلی و.

هغه مهال د حامد کرزي او عبدالله عبدالله ترمنځ د دویم پړاو ټاکنو ترسره کېدل اعلان شول. د ۱۳۸۸ کال د لړم په لومړۍ نېټه اعلان وکړ، چې د رایو د روڼتیا د تضمین په برخه کې د ټاکنو د خپلواک کمېسیون پر ژمنتیا د شک له امله نه غواړي، چې په دویم پړاو ټاکنو کې ګډون وکړي. له دې سره حامد کرزی د افغانستان ولسمشر شو.

ډاکټر عبدالله عبدالله یو ځل بیا د ۱۳۹۲ کال په تلې میاشت کې د ولسمشریزو ټاکنو لپاره خپله نوماندي اعلان کړه. په لومړي پړاو کې هېڅ نوماند اکثریت رایه پوره نه کړه او د اوسني افغان ولمسشر محمد اشرف غني او عبدالله عبدالله چې دوه مخکښ نوماندان و ترمنځ بیا ټاکنیزه سیالي وشوه.

د ټاکنو د خپلواک کمېسیون د پرېکړې له مخې دویم پړاو ټاکنې د ۱۳۹۳ کال د غبرګولي په ۲۵ مه ترسره شوې. دویم پړاو ټاکنو د پایلې په اړه له جنجالونو وروسته د سیاسي توافقنامې له مخې په هېواد کې د ملي یووالي حکومت رامنځته شو، چې په کې ډاکټر محمداشرف غني د افغانستان د اسلامي جمهوریت د ولسمشر او ډاکټر عبدالله عبدالله د افغانستان د اسلامي جمهوریت د اجرایوي رییس په توګه وټاکل شو. عبدالله عبدالله

د انځور حقوق Social Media
Image caption د عبدالله عبدالله لومړی معاون عنایت الله بابر فرهمند او دویم مرستیال یې اسدالله سعادتي دی.

محمد حنیف اتمر

محمد حنيف اتمر د محمد اصف اتمر زوی په ۱۳۴۶ لمزیز کال لغمان کې زېږیدلی.

محمد حنيف اتمر د عامه کړنلارو، نړېوالو اړيکو او د جگړې وروسته بيا رغونې په برخه کې ماسټري کړې.

ټاکنیز شعار یې "سوله او اعتدال" دی.

د ۱۳۹۸ ولسمشرۍ ټاکنو لپاره د حنیف اتمر لومړی معاون د اسلامي جمعیت ګوند استازی دی یونس قانوني. دویم مرستیال یې د خلکو د یوالي ګوند مشر محمد محقق دی.

محمد حنیف اتمر وړاندې د افغان ولسمشر محمد اشرف غني د امنیت شورا سلاکار په توګه دنده کړې. لومړی ځل یې دی چې ولمسشرۍ ټاکنو ته ځان نوماندوي.

د پخواني ولسمشر حامد کرزي په حکومت کې یې د کورنيو چارو، د ښوونې او روزنې او د کليو د پراختيا او بيا رغونې د وزير په توگه هم دندې ترسره کړي.

د انځور حقوق Social Media
Image caption د ۱۳۹۸ ولسمشرۍ ټاکنو لپاره د حنیف اتمر لومړی معاون د اسلامي جمعیت ګوند استازی دی یونس قانوني. دویم مرستیال یې د خلکو د یوالي ګوند مشر محمد محقق دی.

احمد ولي مسعود

احمد ولي مسعود د دوست محمد خان زوی په (۱۳۴۳ ه ش) کې زیږیدلی. نوموړی د "احمدشاه مسعود" په نوم بنسټ مشر دی. په ډیپلوماټیکو مطالعو کې یې زده کړې کړي.

ټاکنیز شعار یې "ملي وفاق" دی.

لومړۍ مرستیاله یې د افغانستان د لوړو زده کړو پخوانۍ وزیره فریده مومند او دویم مرستیال یې عبدالطیف نظری دی.

وړاندې په انګلستان کې د افغان سفير په توګه دنده کړې.

د انځور حقوق Social Media
Image caption د احمد ولي مسعود لومړۍ مرستیاله د افغانستان د لوړو زده کړو پخوانۍ وزیره فریده مومند او دویم مرستیال یې عبدالطیف نظری دی.

ګلبدین حکمتیار

ګلبدین حکمتیار د غلام قادر زوی د ۱۳۲۶ ل کال لړم میاشت د افغانستان شمالي کندوز ولایت کې زیږېدلی دی. نوموړي د کابل پوهنتون انجینرۍ پوهنځي کې لنډه موده درس ویلی، خو د خپلو سیاسي فعالیتونو له کبله یې لوړې زده کړې پرېښودې.

ګلبدین حکمتیار د افغانستان اسلامي ګوند مشر دی.

د ښاغلي ګلبدین حکمتیار دواړه مرستیالان دده د ګوند غړي دي. لومړی مرستیال یې فضل هادي وزین په قوم اوزبک او د پوهنتون استاد دی. دویم مرستیال یې حفیظ الرحمن نقي د پوهنتون استاد دی.

حکمتیار د ۲۰۰۱ کال د سپټمبر د یوولسمې له پېښو، د طالبانو د تحریک له ړنګېدو او افغانستان ته د امریکا په مشرۍ د نړیوالو ځواکونو له راتلو وروسته، د بهرنیو ځواکونو پروړاندې وسلې ته لاس کړ.

شاوخوا شل کاله وروسته له دغې مودې یې له افغان حکومت سره د (۱۳۹۵/تله) د سولې توافقنامه لاسلیک کړه.

د انځور حقوق Social Media
Image caption د ښاغلي ګلبدین حکمتیار دواړه مرستیالان دده د ګوند غړي دي. لومړی مرستیال یې فضل هادي وزین په قوم اوزبک او د پوهنتون استاد دی. دویم مرستیال یې حفیظ الرحمن نقي د پوهنتون استاد دی.

عبدالطیف پدرام

عبدالطیف پدرام د افغانستان د پارلمان پخوانی غړی دی. نوموړی تېرو ټاکنو کې هم ولسمشرۍ ته ځان نوماند کړی و.

د نوموړي ټاکنیز شعار "ازادي، عدالت او امنیت" دی. په اسلام پېژندنه کې یې دکتورا کړې.

عبدالطیف پدرام د "ملي کنګرې ګوند" مشرد ۱۳۹۸ کال ولسمشرۍ ټاکنو ته یو وار بیا ځان بیا نوماند کړی. د نوموړي لومړی مرستیال احسان الله حیدري د پدرام لومړی او محمد صادق وردګ یې دویم مرستیال ټاکلی.

د انځور حقوق Social Media
Image caption د عبداللطیف پدرام لومړی مرستیال احسان الله حیدري او محمد صادق وردګ یې دویم مرستیال ټاکلی.

رحمت الله نبیل

د ملي امنیت پخوانی مشر رحمت الله نبیل په کال ۱۳۴۸ ل د میدان وردګ جغتو ولسوالۍ کې زېږېدلی. ساختماني انجینیري یې لوستې. "د افغانستان د خلکو محور" په نوم د یوه سیاسي بهیر مشري کوي. د نوموړي لومړی وار دی چې ولمسشرۍ ته ځان نوماندوي.

ټاکنیز شعار یې "امنیت او عدالت" دی.

د افغانستان نظامي څېره جنرال مراد علي مراد د ښاغلي نبیل لومړی مرستیال او مسعود جلال یې دویمه مرستیاله ده. اغلې جلال په وړمو ټاکنو کې ځان ولسمشرۍ ته نوماند کړی و.

د انځور حقوق Social Media
Image caption د افغانستان نظامي څېره جنرال مراد علي مراد د ښاغلي نبیل لومړی مرستیال او مسعود جلال یې دویمه مرستیاله ده.

زلمی رسول

زلمی رسول په کال ۱۳۳۲ ل کابل کې زېږېدلی. تر دوکتورا کچې یې زده کړې کړي.

د نوموړي د ټاکنیز ټیم شعار "ملي یو والی، عدالت، امنیت، سوله، اعتدال او برابري" دی.

نوموړي عبدالجبار تقوا د لومړي او خان محمد وحدت د دویم مرستیال په توګه ټاکلي دي. د ۱۳۹۸ ولسمشریزو ټاکنو لپاره یوځل بیا دریدلی.

ښاغلی رسول د ۱۳۹۳ ولسمشریزو ټاکنو کې نوماند و.

د پخواني ولمسشر حامد کرزي په حکومت کې یې د هوايي چلند وزیر، د ولسمشر د ملي امنیت سلاکار او بیا د بهرنیو چارو وزیر و.

د انځور حقوق Social Media
Image caption زلمي رسول عبدالجبار تقوا د لومړي او خان محمد وحدت د دویم مرستیال په توګه ټاکلي دي.

عبدالحکیم تورسن

عبدالحکیم تورسن په ۱۳۳۳ ل کال کابل کې نړۍ ته سترګې غړولي. کابل پوهنتون کې یې په فارسي ادبیاتو کې زده کړې کړي.

د افغانستان پخواني ولسمشر نجیب الله نظامي مرستیال و.

ټاکنیز شعار یې "موږ عمل کوو، شعار نه ورکوو" دی.

ښاغلي تورسن نادرشاه احمدزی او شفیع قیصاري د خپل مرستیالانو په توګه ټاکلي دي. نوموړی پخوا هم ولسمشرۍ ته درېدلی و.

د انځور حقوق Social Media
Image caption ښاغلي تورسن نادرشاه احمدزی او شفیع قیصاري د خپل مرستیالانو په توګه ټاکلي دي. نوموړی پخوا هم ولمسشرۍ ته درېدلی و.

محمد ابراهیم الکوزی

محمد ابراهیم الکوزی د "الکوزیانو سراسري شورا" په نوم د ټولنې مشر دی.

ابراهیم الکوزي د ۱۳۹۸ ولسمشرۍ ټاکنو لپاره ځان نوماند کړی.

ټاکنیز شعار یې "ژمنه او عمل" دی.

خدیجه غزنوي د ښاغلي الکوزي لومړۍ مرستیاله او دویم معاون یې سامع کياني دی.

د انځور حقوق Social Media
Image caption خدیجه غزنوي د ښاغلي الکوزي لومړۍ مرستیاله او دویم معاون یې سامع کياني دی.

نورالحق علومي

نورالحق علومي په ۱۳۲۹ ل کال کابل کې زېږېدلی. د چنګاښ ۲۹ ولسمشرۍ ټاکنو ته یې د نوماند په توګه نوم لیکنه کړې. په نظامي برخه کې یې زده کړې کړي.

د نوموړي لومړی مرستيال احمد بشیر بيژن او دويم مرستيال يې نعيم غيور دی.

د ملي یوالي حکومت کې یې د کورنیو چارو وزیر په توګه هم کار کړی.

د انځور حقوق Social Media
Image caption د نورالحق علومي لومړی مرستيال احمد بشیر بيژن او دويم مرستيال يې نعيم غيور دی.

فرامز تمنا

فرامرز تمنا د افغانستان د بهرنیو چارو وزارت د ستراتیژیکو مطالعاتو پخوانی رییس او د پوهنتون استاد دی. فرامرز تمناپه په نړیوالو اړیکو کې دوکتورا تر کچې زدکړې کړي.

د ټاکنیز ټیم شعار یې "د افغانستان پراختیا او تدبیر" دی.

د نوموړي لومړی مرستیال سید قیاس سعیدي او محمد امین رشادت دی.

د انځور حقوق Social Media
Image caption د فرامرز تمنا لومړی مرستیال سید قیاس سعیدي او محمد امین رشادت دی.

نور رحمن لېوال

نور رحمن لېوال افغان سوداګر او د ټکنالوژي یوه شرکت مشر دی. شخصي ټلویزیون هم لري.

ښاغلي لېوال داکتر عبدالهادی ذوالحکمت د لومړي او یحیا ویاړ د دویم مرستیال په توګه معرفي کړي دي.

ټاکنیز شعار: مسولیت او عدالت.

وړاندې هم ولسمشرۍ ټاکنو ته درېدلی و.

د انځور حقوق Social Medial
Image caption ښاغلي لېوال داکتر عبدالهادی ذوالحکمت د لومړي او یحیا ویاړ د دویم مرستیال په توګه معرفي کړي دي.

محمد شهاب حکيمي

د افغانستان د ۱۳۹۸ ولسمشرۍ ټاکنو لپاره بل کاندید محمد شهاب حکیمی دی. د ادارې په برخه کې تر ماستري کچې زدکړې کړي.

د نوموړي لومړی مرستیال عبدالعلی سرابي او دویم مرستیال یې نورالحبیب حصیر دی.

ټاکنیز شعار یې "سوله، قانونیت او رفاه" دی.

نوموړي څوکاله د (MDC) ماین پاکۍ موسسې د مشر په توګه دنده کړې.

د انځور حقوق Social Media
Image caption د محمد شهاب حکیمي لومړی مرستیال عبدالعلی سرابي او دویم مرستیال یې نورالحبیب حصیر دی.

عنايت الله حفيظ

عنایت الله حفیظ په ۱۳۵۷ ل د میدان وردګ په بهسودو ولسوالۍ کې زېږېدلی. د سوداګري په برخه کې یې ماسټري کړې.

لومړی معاون یې جنت خان فهیم او دویم مرستیال یې عبدالجمیل شیراني دی.

څو کاله د ټرانسپورټ وزارت سلاکار و.

د انځور حقوق Social Media
Image caption د عنیات الله حفیظ لومړی معاون جنت خان فهیم او دویم مرستیال یې عبدالجمیل شیراني دی.

شیدا محمد ابدالي

په هند کې د افغانستان پخوانی سفير شيدا محمد ابدالي هم د ۱۳۹۸ ولسمشرۍ ټاکنو لپاره ځان نوماند کړی.

د نوموړی لومړی مرستیال عبدالبصير سالنګى او دویم مرستیال یې ذوالفقار امید دی.

د انځور حقوق Social Media
Image caption د شیدا محمد ابدالي لومړی مرستیال عبدالبصير سالنګى او دویم مرستیال یې ذوالفقار امید دی.

سید نورالله جلیلي

سید نور الله جلیلي په ۱۳۵۲ ل ننګرهار کې زېږېدلی. کابل طبي پوهنتون یې لوستی. د ۱۳۹۸ ولسمشرۍ ټاکنو لپاره بل نوماند دی.

نوموړي خلیل رومان او چراغ علي چراغ د مرستیالانو په توګه معرفي کړي دي.

د انځور حقوق Social Media
Image caption سید نورالله جلیلي خلیل رومان او چراغ علي چراغ د مرستیالانو په توګه معرفي کړي دي.

غلام فاروق نجرابي

غلام فاروق نجرابي د ماشومانو د زړه ناورغۍ متخصص دی. نوموړی د ۱۳۸۱ ل لویې جرګه کې چې د انتقالي دولت لپاره جوړه شوې وه، د دولت ریاست لپاره نوماند و.

د ۱۳۸۳ او ۱۳۸۸ ولسمشریزو ټاکنو ته هم دریدلی و.

لومړی معاون یې شریف الله او دویم مرستیال یې محمد شریف بابکرخیل دی.

د انځور حقوق Social Media
Image caption د غلام فاروق نجرابي د مرستیالانو انځورنه تر اوسه ترلاسه شوي نه دي.

اړونده مطالب

ورته مطالب