د مجددي د مړينې په مناسبت چهارشنبه عمومي رخصتي اعلان شوه

غني د انځور حقوق ARG
Image caption ولسمشر غني د صبغت الله مجددي د مړینې په مناسبت د خواشینۍ پیغام کې نوموړی نه هېرېدونکی شخصیت وباله

افغان حکومت د پخواني ولسمشر حضرت صبغت الله مجددي د مړینې په مناسبت سبا 'چهارشنبه ' عمومي رخصتي اعلان کړې.

د افغانستان پخوانی ولسمشر او د ملي نجات ګوند رييس حضرت صبغت الله مجددي د ورپېښې ناروغۍ له امله د ۹۳ کلونو په عمر تېر ماښام له دې نړۍ سترګې پټې کړې.

افغان ولسمشر محمد اشرف غني د حضرت صبغت الله مجددي د خدمتونو ستاینه کړې او هغه یې یو 'نه هېرېدونکی شخصیت ' بللی.

ښاغلي غني د کابینې غونډې ته ویلي، اړوند ادارو ته یې امر کړی، چې د صبغت الله مجددي جنازې مراسمو ته ځانګړي مراسم ونیسي.

د حضرت مجددي جناره سبا کابل ښار کې کېږي. د نوموړي په مړینه بیلابیلو افغان چارواکو او سیاستوالو خواخوږي څرګنده کړې.

مجددي: ولسمشر کرزی د تړون ځنډولو حق نه لري

د سولې عالي مشورتي بورډ غړي اعلان شوي

'مجددي 'هجرت' نه دی کړی'

افغان ولسمشر محمد اشرف غني او اجراییه رییس عبدالله عبدالله د نوموړي مړیني په مناسبت پیغامونو کې نوموړی د افغان تاریخ 'یو اغېزمن شخصیت ' بللی دی.

صبغت الله مجددي د نقشبندیه طریقت سلسلې له مشایخو یو و او شیخ احمد سرهندي ته منتسب و، چې په مجدد الف الثاني مشهور دی.

حضرت صبغت الله مجددي په ۱۹۲۶ کال د مجدديانو په مشهوره ديني کورنۍ کې زيږېدلی و. نوموړي د مصر په الازهر پوهنتون کې خپلې لوړې زده کړې پای ته رسولې وې.

غبرګونونه

په افغانستان کې د صبغت الله مجددي پر مړینه د خواشینۍ غبرګونونه ښودل شوي. اجراییه مشر عبدالله عبدالله د صبغت الله مجددي پر مړینې د خواشینۍ سربېره هغه یو منځلاری مشر او سپین ګوی بللی دی.

د انځور حقوق Getty Images
Image caption افغانستان کې د ثور له کودتا وروسته مجددي پاکستان ته ولاړ او د کابل دولت پر وړاندې يې سياسي او وسله واله مبارزه پيل کړه

افغانستان کې د ثور له کودتا وروسته چې د خلق ديموکراتيک ګوند قدرت ته ورسېد مجددي پاکستان ته ولاړ او د ملي نجات جبهې په نامه يې د کابل دولت پر وړاندې سياسي او وسله واله مبارزه پيل کړه.

په ۱۹۹۲ کال کې د ډاکتر نجيب الله د حکومت له ړنګېدو وروسته ښاغلي مجددي د افغانستان اسلامي دولت د لومړني ولسمشر په توګه د څو مياشتو لپاره دنده ترسره کړې وه.

د طالبانو د واکمنۍ پر مهال نوموړي ځان له سياسته ګوښه کړی و چې په ۲۰۰۳ کال کې د اساسي قانون د لويې جرګې د مشر په توګه وټاکل شو.

د انځور حقوق AFP
Image caption صبغت الله مجددي چې د یوه منځلاري ګوند مشر و، ډېری پلویان یې خپل مریدان، قومي مشران او یو شمېر لوستي روڼ اندي و چې پخوانی ولسمشر حامد کرزی هم پکې راځي.

صبغت الله مجددي د طالبانو حکومت له نسکورېدو وروسته ۲۰۰۱ لومړي کال کې د بون له بهیر سره یو ځای شو او د افغانستان سیاست کې فعاله ونډه درلوده.

نوموړي د افغانستان مشرانو جرګې د مشر په حیث هم دنده درلوده او د سولې ټینګښت کمېسیون مشري یې هم کړې.

اړونده مطالب

ورته مطالب