دوې ښځې د افغانستان ټاکنیزو کمېسیونونو مشرانې وټاکل شوې

د افغانستان ټاکنیزو کمېسیونونو له خپلنمځي ټاکنو وروسته نن سې شنبه ( حوت ۱۴ ) خپل اداري پلاوی ټاکلی دی. د هغو ټاکنو له پایلې وروسته چې ټاکنو کمېسیون کې وشوې، حوا علم نورستانۍ د ټاکنو خپلواک کمېسیون او زهره بیان شینوارې د ټاکنیزو شکایتونو کمېسیون مشره وټاکل شوه.

د ټاکنو کمېسیون مشرتابه لپاره د حوا علم نورستانۍ او محمد عبدالله تر منځ سیالۍ کې حوا علم نورستانۍ ډېرې رایې تر لاسه کړې.

د افغانستان د ټاکنو خپواک کمېسیون مرستیال ویاند میرزا محمد حقپرست بي بي سي ته وویل، حوا علم نورستانۍ د دغه کمېسیون نوې مشره ټاکل شوې، سید عصمت الله مل یې مرستیال او مسافر قوقندي د کمېسیون منشي ټاکل شوی دی.

حوا علم نورستانۍ د درېیو کلونو لپاره د ټاکنو کمېسیون غړیتوب ته غوره شوې وه.

هغه کابل ولایت کې زیږېدلې او حقوق یې لوستي. اغلې نورستانۍ د ملي نجات ګوند له خوا دغه پوست ته نومانده وه. مخکې یې له نورستان ولایته په ولسي جرګه کې غړیتوب درلود.

د انځور حقوق SOCIAL MEDIA

زهره بیان شینوارې د پنځو کلونو لپاره د ټاکنیزو شکایتونو اورېدو کمېسیون غړې ټاکل شوې. هغه د کابل شمال پروان ولایت کې زیږېدلې او په حقوقو کې یې زدکړې کړې دي. اغلې شینوارې د ملي سولې ګوند له خوا دغه پوست ته معرفي شوې وه.

حوا عالم نورستانۍ د بي بي سي عصمت بهیر ته په یوه مرکه کې ویلي، د کار لومړیتوب به یې په کمېسیون کې اصلاحات راوستل، د ولسي جرګې د پاتې وکیلانو د رایو د وروستیو پایلو او د غزني ولایت د ټاکنو لپاره چمتووالی دی.

دا وايي، هڅه به یې دا وي چې د ټاکنو خپلواک کمېسیون له "لاسته تللی" حیثیت وساتل شي.

د افغانستان د ټاکنیزو کمېسیونو نویو غړو د دوشنبې په ورځ (کب ۱۳مه) د ولسمشر په حضور کې لوړه وکړه او رسماً یې خپل کار پیل کړ.

د ولسمشرۍ ماڼۍ وړمه ورځ په یوه فرمان کې د ټاکنو خپلواک کمېسیون او د ټاکنیزو شکایتونو اورېدو کمېسیون غړي معرفي کړل. دغه غړي د تېرې جمعې په ورځ د ولسمشرۍ له خوا غوره شوي وو.

کابو دوې اوونۍ مخکې ولسمشرمحمد اشرف غني د ټاکنو قانون کې بدلون راوست او د ټاکنیزو کمیسیونونو پخواني کمشینران او مشران یې، ټول له دندو لیرې کړل.

د انځور حقوق ARG
Image caption د ټاکنیزو کمېسیونونو کمشنرانو پرون ارګ کې لوړه وکړه

د افغانستان لویې څارنوالۍ د کمیسیونونو پخوانۍ رهبرۍ له افغانستانه ممنوع الخروج اعلان کړي دي.

د ټاکنیزو کمیسیونونو پخواني مشران د ولسي جرګې د تلې میاشتې په ټاکنو کې په کمزوري مدیریت تورن دي. چې لا تر اوسه د دهمدغو ټاکنو د ۱۵ ولایتونو د بریالیو نوماندانو وروستۍ پایلې نه دي اعلان شوې.

خو د کمیسیونونو پخواني مشران د ولسمشر له خوا د ټاکنو قانون کې بدلون راوستل د قانون خلاف کړنه یادوي او وايي چې له دندو د دوی لیري کول هم سیاسي پرېکړه وه.

ولسمشر غني د تېرې دوشنبې په ورځ (فبروري ۴مه) ارګ کې د تحلیف د مراسمو بهیر پر مهال، ټاکنیزو سرغړونکو ته به د نافذه قوانینو له مخې جزا ورکول کېږي:

"د نوي قانون د تعدیل په اساس، ټولنې انتخاباتي تېروتنې د افغانستان د جزا په نافذو قوانینو کې پیشبیني شوې دي او ټولې سرغړونې به د عدلي ارګانو له خوا وڅېړل او مرتکبینو ته به جزا ورکول کېږي."

د انځور حقوق Social media
Image caption د ټاکنیزو کمېسیونو څوارلس غړي تازه معرفي شوي دي

ورته مطالب