ولسمشریزې ټاکنې: لګښت یې نژدې ۲۰۰ میلیونه ډالرو ته رسېږي

ټاکنې

د افغانستان ټاکنو خپلواک کمېسیون مسوولین وايي، د دوی د اټکل له مخې د افغانستان راتلونکو ولسمشریزو ټاکنو لومړنی لګښت به ۱۹۲ میلیونو ډالرو ته ورسېږي.

د دغه کمېسیون یوه غړی مولانا محمد عبدالله وايي، د نړیوالو ادارو تر څنګ به افغان حکومت هم د دغه لګښت یوه برخه پر غاړه واخلي. هغه وايي:

''دغه دواړه سرچینې همکارې دي، خو د دوی همکارۍ د ټاکنو کمېسیون له لوري د لګښتونو مشخصې طرحې پورې تړلې دي. ''

له دې مخکې ویل شوي وو، چې د ټاکنو لپاره د لګښت پیسو موندلو کې ستونزې شته او تمویلونکو ادارو خپلې مرستې په دغه بهیر کې په اصلاحاتو پورې تړلې دي.

د انځور حقوق Getty Images
Image caption افغان امنیتي ادارې وايي، د ټاکنو امنیت خوندیتوب ته ژمن دي

د افغانستان ولسمشریزې ټاکنې به له پروګرام سره سم د روان کال تلې یا میزان میاشتې پر شپږمه نېټه کېږي.

د افغانستان پارلماني ټاکنو لګښت چې د تېر کال تلې میاشت کې وشوې، ۱۲۰ میلیونه ډالره و، چې ۱۱ میلیونه یې افغان حکومت ورکړ.

"ولسمشریزې ټاکنې به له اساسي قانون سره سمې یو کال وروسته کېږي"

عبداللطیف پدرام د لومړي کس په توګه ولسمشرۍ ته کاندید شو

د افغان ټاکنو ډېر لګښت د ټاکنیزو موادو پر پېرلو او د تجهیزاتو پر لېږدولو او دغه راز د ټاکنو بهیر کارکوونکو پر حق الزحمه کېږي.

بل لور ته همدا نن 'پنجشنبه مارچ ۲۸ ' د افغان امنیتي ادارو او ټاکنو خپلواک کمېسیون تر منځ یوه هوکړه لاسلیک شوه.

د انځور حقوق Getty Images
Image caption د ټاکنیزو موادو لېږد رالېږد او د کارکوونکو حق الزحمه د لګښتونو یوه برخه ده

په دې مناسبت یوې غونډې ته وینا کې د افغانستان کورنیو چارو وزارت چار سمبالي مسعود اندرابي وویل، 'د هېواد امنیتي ځواکونه د راتلونکو ټاکنو لپاره د امنیت خوندي ساتلو ته ژمن دي. '

نوموړی وايي، د تېرو ټاکنو نیمګړتیاوو ته په پام سره به د نوم ثبتولو له بهیره نیولې بیا د موادو انتقال، کاندیدانو امنیت او د رایې اچوونې تر پړاوه پورې د ټاکنیزو مرکزونو امنیت خوندیتوب باوري شي.