خلیلزاد له اسلام اباده کابل ته ستون شو

خلیلزاد د انځور حقوق Getty Images
Image caption ښاغلی خلیلزاد پاکستان ته له دوې ورځني سفر وروسته کابل ته ستون شوی دی

امریکايي چارواکي وايي، تمه لري چې پاکستان به د افغانستان د سولې بهېر ملاتړ لپاره خپل مثبت رول ته دوام ورکوي. دا خبره پاکستان ته د افغان سولې لپاره د امریکا ځانګړي استازي زلمي خلیلزاد د دوه ورځني سفر په پاي کې اسلام اباد کې د امریکا سفارت یوې وینا پاڼه کې کړې ده.

په دغه سفر کې ښاغلي خلیلزاد د پاکستان د بهرنېو چارو له وزیر شاه محمود قرشي او د پاکستان له لوی درستیز قمر جاوید باجوه سره وکتل او د افغان سولې پر بهیر یې خبرې ورسره وکړې.

د سفارت په وینا پاڼه کې راغلي، دې کتنو کې زلمي خلیل زاد د طالبانو پلاوي ته د سفر زمینې برابرو له امله د پاکستان مننه وکړه.

ښاغلي خلیلزاد پر ټویټر پاڼه لیکلي د پاکستان لخوا د بیا لپاره دې خبرې باندې تاکید چې دا افغانان دي چې خپله به خپله راتلونکې ټاکي مننه کوي.

ښاغلی خلیلزاد اوس بېرته کابل ته ستون شوی دی.

زلمی خلیلزاد پرون اسلام اباد ته تللی و او له دې وړاندې یې په کابل کې له چارواکو سره د سولې پر لارو چارو خبرې کړې وې. د پاکستان پوځ په وینا د ښاغلي خلیلزاد او جنرال باجوه تر منځ غونډه کې په ځانګړې توګه د افغان سولې په تړاو خبرې شوې دي.

د سولې خبرې: خلیلزاد وايي، 'له لوړو ژورو سره مو پرمختګ وکړ'

غني: سوله کوو، خو چا ته د تسلیمېدو خط نه ورکوو

عمران خان: افغانان یې مني او که نه، د ورورګلوۍ مشوره ورکوم

تر دې مخکې د پاکستان بهرنیو چارو وزارت ویلي و، د دغه هېواد بهرنیو چارو وزیر شاه محمود قریشي پر بین الافغاني خبرو ټینګار کړی دی.

د ښاغلي قریشي په وینا، افغانستان کې سوله د پاکستان په ګډون د ټولې سیمې په ګټه ده.

زلمي خلیلزاد په اسلام اباد کې پاکستاني چارواکو ته په دوحه کې له طالبانو سره د خبرو په تړاو معلومات ورکړي. نوموړي ویلي، افغانستان کې د سولې لپاره هیلې ډېرې شوې دي.

ښاغلي خلیلزاد د افغان سولې بهیر کې د پاکستان له مرستې په یوه ټویټر پیغام کې مننه کړې.

اسلام اباد ته له خپل دغه دوه ورځني سفره مخکې ښاغلي خلیلزاد په کابل کې د افغان ولسشمر محمد اشرف غني په ګډون له حکومتي او سیاسي مشرانو سره لیدلي وو.

زلمي خلیلزاد پر خپله ټویټر پاڼه لیکلي و چې د سولې لپاره د افغان دولت له مرکچي پلاوي سره يي د بین الافغاني خبرو د جدي اړتیا په سر خبرې کړې دي، خو ده تر اوسه له طالب استازو سره د شپږم پړاو خبرو او نېټې په اړه څه ندي ویلي.

ورته مطالب