'افغانستان کې تېر کال ولسي مرګ ژوبله ۱۹٪ لوړه شوې'

ولسي مرګ ژوبله
Image caption ولس ته ډېره مرګ ژوبله سوېلي ولایتونو کې اوښتې ده.

د افغانستان د بشري حقونو خپلواک کمېسیون د افغان ولسي مرګ ژوبلې په کلني رپوټ کې ویلي، تېر لمریز کال جګړو او شخړو د څه باندې درې زرو افغانانو ژوند اخیستی او نژدې نهه زره نور ټپیان شوي دي.

دغه کمېسیون د چارشنبې په ورځ (اپریل ۲۳مه) وویل، په افغانستان کې د جګړو او شخړو په ډېرېدو سره د بشري حقونو د سرغړونو وېرې هم ډېرې شوې دي.

د دغه کمیسیون د موندنو پربنسټ، د وړم کال پرتله تېر کال د ولسي وګړو په مرګ ژوبله کې ۱۹ سلنه ډېروالی راغلی.

* غني: په تېرو ۴ کلونو کې ۴۵ زره افغان ځواکونه وژل شوي

* "د کندوز هوايي برید ولسي خلکو ته مرګ ژوبله اړولې"

دغه کمېسیون وايي، تېر کال د افغانستان په سوېلي ولایتونو کې ولسي وګړو ته ډېره مرګ ژوبله اوښتې ده.

د بشري حقونو کمېسیون په رپوټ کې راغلي، تېر کال په هلمند، کندهار او ارزګان ولایتونو کې لږترلږه ۳۸۴۱ کسان وژل شوي او ټپیان شوي دي.

همدارنګه، په ختیځه حوزه کې هم ۲۴۶۸ کسان ټپیان شوي او وژل شوي.

په مرکزي ولایتونو کې د ولسي وګړو د مرګ ژوبلې شمېر ۲۲۰۳ کسانو ته ته رسېدلی و.

د انځور حقوق Getty Images

د بشري حقونو خپلواک کمیسیون په رپوټ کې ویل شوي، تېر کال د ولسي وګړو د اعلان شوې مرګ ژوبلې ۲۷ سلنه ولسي وګړي په ځانمرګو بریدونو، ۲۰ سلنه په ځمکنیو عملیاتو او ۱۹ سلنه یې سړک غاړې ماینونو او توغندیزو بریدونو کې وژل شوي.

په افغانستان کې د ملګرو ملتونو سیاسي استازولۍ 'یوناما' تېره پرورۍ وویل، په تېر ۲۰۱۸ کال کې د افغان ولسي وګړو مرګ ژوبله تر هر بل وخت ډېره شوې ده.‌

د دې رپوټ له مخې، پر ۲۰۱۸ کال د حکومت مخالفو وسله والو، نړیوالو ځواکونو او افغان ځواکونو په بریدونو او بمباریو کې ۳۸۰۴ ولسي وګړي وژل شوي او ۷۱۸۹ نور ټپیان شوي دي.

ورته مطالب