"د ناټو وتل افغانستان کې دایمې سولې سره تړلي دي"

کې د انځور حقوق NATO
Image caption نېکولاس کې له بي بي سي سره ځانګړې مرکه کړې

په افغانستان کې د ناټو ملکي استازی نیکولاس کې وایي، له دغه هیواده د ناټو ځواکونو وتل په دې پورې تړلي دي چې افغانان په خپل منځ کې د افغانستان د راتلونکي په اړه یو سیاسي جوړجاړي ته ورسیږي.

ښاغلی کې وایې، داسې جوړجاړی چې تلپاتې سوله راولي، ناټو هېوادونه ډاډمنوي چې افغانستان بیا د ترهګرو پټن ځای نه ګرځي. د ده په وینا په داسې یوه حالت کې به بیا افغانستان کې د ناټو ماموریت پای ته رسیږي.

د ناټو ملکي استازي نیکولاس کې له بي بي سي سره د ځانګړې مرکې پر مهال وویل:

"موږ او امریکا دلته په ګډه راغلي یو او د ناټو په چوکاټ کې ګډ کار کوو، او کله چې وځو هم یوځای به وځو. خو هغه وخت چې ماموریت پای ته ورسیږي".

د انځور حقوق NATO in Afghanistan
Image caption نېکولاس کې کندهار ته د رسمي سفر پر مهال

ښاغلې کې ویلي، په افغانستان کې د ناټو ماموریت هدف ډیر روښانه دی، او هغه دا چې افغانستان یو ځل بیا د نړیوالو ترهګرو په پټنځای بدل نه شي.

نوموړي زیاته کړه، ناټو دا هیله نه لري چې افغانستان کې د تل لپاره پاتې شي.

د ښاغلي نیکولاس په خبره د ناټو غړي هیوادونه په افغانستان کې د یوه داسې تړون غوښتونکي دي چې د هېواد د راتلونکې لپاره پکې ټول افغانان ځان وویني، داسې سوله چې د تېرو کلونو ټولې لاسته راوړنې، لکه بشري حقونو ته درناوی، دیموکراسي، ښه حکومتولي او پیاوړي بنسټونه په کې خوندي شي.

د انځور حقوق NATO in Afghanistan
Image caption نېکولاس کې ویلي، هر ډول جوړجاړي کې باید د ښځو حقونه پام کې ونیول شي

د ناټو ملکي استازي د افغانانو ترمنځ پر خپلمنځي خبرو هم ټینګار وکړ او زیاته یې کړه، ناټو په ښکاره توګه د دې پلوي کوي چې د میز تر شا د افغانستان د راتلونکې په اړه پرېکړه یوازې د افغانانو کار دی.

هغه وویل:

"له افغانانو مې هدف ټول افغان وګړي دي. مدني فعالان، ښځې، ځوانان، سیاسي څېرې او طالبان باید سره کښیني او خپلې ستونزې هوارې کړي".

ورته مطالب