د افغانستان عالمانو شورا: تېرو ۱۵ کلونو کې زر عالمان 'وژل' شوي

افغان عالمان د انځور حقوق AFP
Image caption افغان عالمان له حکومته د علماوو د ساتنې غوښتنه کوي

شورا وايي دوی په تېره یوه نیمه لسیزه کې له زرو ډېرې داسې قضیې ثبت کړي چې دیني عالمان پکې هدف ګرځول شوي او وژل شوي دي.

د افغانستان د علماوو شورا په مولوي سمیع الله ریحان د تېرې ورځې برید هم غندلی او حکومت يي په ناغېړۍ تورن کړی.

سمیع الله ریحان چې وتلې دیني څېره او مفتي بلل کېده، تېره ورځ د کابل نهمې حوزې اړوند د التقوا جومات په ممبر کې د ځای پر ځای شوي بم په نتیجه کې ووژل شو. په پېښه کې ۱۶ نور کسان ټپي شوي هم دي.

مولوي سمیع الله ریحان تر ډېره د دولت پلوه او د یوه ازاد فکره عالم په توګه پېژندل کېده؟ هغه په ممبر، تلویزیونونو او ازادو بحثونو کې روانه جګړه ننګوله. خو خبر نه چې دی د همدې جګړې یو قرباني دی.

داسې قرباني چې لا يي د مرګ مسؤولیت هم چا نه دی اخیستی.

۴۵ کلن مولوي سمیع الله ریحان په ځانګړي انداز په تبلیغ پېژندل کېده، هغه تر ډېره د دیني علماوو او عامو خلکو له باورونو خلاف د مېرمنو او ناوړه رواجونو په اړه پراخ لید درلوده او بیاناوه يې.

ده واده کړی وو او د دریو اولادونو پلار و.

د انځور حقوق ARG/Social Media
Image caption کورنیو چارو وزارت وايي په دې پېښه کې د هېواد لوی مفتي او عالم سمیع الله ریحان وژل شوی او ۱۶ کسان ټپیان شوي دي.

دې پېښې نه یوازې د افغانستان په ډېرو سیمو کې د هغه مینه وال غمجن کړل، بلکې د افغانستان علماوو د شورا او د ملګرو ملتونو اندېښنې هم پارولي دي.

یوناما

یوناما په یوه خبرپاڼه کې د جومات دننه برید پر ولسي وګړو برید بللی او غندلی یې دی.

د افغانستان د عالمانو شورا غړي مولوي نور پاچا بي بي سي ته وویل په روانه جګړه کې تر ډېره هغه عالمان په نښه شوي چې د افغانستان په ننګه دریځ لري.

له دې وړاندې د کابل د علماوو شورا رییس عبدالبصیر حقاني د نامعلومه کسانو له خوا په کابل کې ترور شو. له هغه مخکې د کابل په یوه هوټل کې د میلاد نبي په اړه د علماو یوه ستره غونډه کې چاودنه وشوه او ترې وړاندې بیا د لویې جرګې خیمې ته نژدې په هغو علماوو ځانمرګی برید وشو چې د سولې په اړه یوه غونډه کې راټول شوي وو.

دې پرله پسې بریدونو د افغانستان د علماوو شورا اندېښمنه کړې اوی دوی په دې برخه کې حکومت په ناغېړۍ تورنوي.

طالبان: د مولوي ریحان وژنه کې موږ لاس نه لرو

د تقوا په جومات کې د چاودنې مسؤولیت چا نه دی اخیستی، خو د افغانستان د کورنیو چارو وزارت ویاند نصرت رحیمي په وینا لومړنۍ څېړنې ښيي چې د برید تر شا طالبان لاس لري.

د طالبانو ویاند ذبیح الله مجاهد بیا بي بي سي ته ویلي، دوی د مولوي ریحان په وژلو کې لاس نه لري.

که څه هم وخت نا وخت په علماوو دغو حملو ته مذهبي رنګ هم ورکړل شوی خو د کورنیو چارو وزارت په پلازمېنه کابل، ننګرهار، کندهار او ځینو نورو ولایتونو کې دا حملې د سیمې د استخباراتو او د دولت د مخالفه وسله والو کار ګڼي چې په وینا يي دوی مخور او د ښه فکر لرونکي خلک نشي زغملای.

ورته مطالب