'د مسکو نننۍ غونډه کې به پر اوربند ټینګار وشي'

ملا عبدالغني برادر د طالبانو له پلاوي سره - مسکو د انځور حقوق Getty Images
Image caption ملا عبدالغني برادر د طالبانو له پلاوي سره - مسکو

په مسکو کې د افغان سولې په تړاو د افغانانو ددویمې خپلمنځي غونډې په اړه د غونډې یوه ګډونوال د نوم نه ښودلو په شرط بي بي سي ته ویلي، نننۍ غونډه کې به له دواړو غاړو پنځه پنځه کسان ګډون کوي، چې د طالبانو مرستیال ملا عبدالغني برادر او پخوانی ولسمشر حامد کرزی به په کې نه وي.

سرچینه وايي، دوه ساعته وځنډېده او د افغان پلاوي ټینګار به دا وي چې د غونډې پای کې طالبان لږترلږه د پنځلس ورځو اوربند لپاره وهڅوي.

دغه سرچینه وايي، امکان شته چې غونډه بلې ورځې ته هم وغځېږي.

د یادې غونډې په تړاو د طالبانو د مرکچي پلاوي غړي سهیل شاهین پر خپل ټویټر لیکلي، په نننیو بین الافغاني غونډو کې به عبدالکریم خلیلي او مسکو کې د افغانستان سفیر نه وي.

ښاغلي شاهین ویلي، د مسکو پرونۍ غونډه کې له کابله د ورغلي پلاوي استازي هم وو. د وسله والو طالبانو ویاند ذبیح الله مجاهد هم پر ټویټر د ښاغلي شاهین د خبرې په تایید لیکلي، چې د مسکو پرونۍ غونډه د روسیې او افغانستان د سل کلنو دیپلوماتیکو اړیکو په اړه وه، چې په وینا یې له کابله ورغلی پلاوی هم په کې و.

نن (سه شنبه/ مې ۲۹/غبرګولی ۸) په مسکو کې د دغې غونډې دویمه ورځ ده.

سرچينې وايي اوربند به هم د نورو مهمو موضوع گانو ترڅنگ د ننيو خبرو د سرټکى وي. غونډه د افغانستان او روسيې ترمنځ د ډيپلوماټیکو اړیکو د سلمې کلیزې په پلمه پرون جوړه شوه او له هماغه پيله ويل شوي وو چې د غونډې دويمه ورځ د افغانانو خپلمنځۍ ناسته ته ځانگړې شوې.

په دې غونډه کې د طالبانو د مرستيال مشر ملا عبدالغني برادار په مشرۍ د دغې ډلې ۱۴ کسیز پلاوي، پخواني ولسمشر حامد کرزي، یو شمېر سیاسي څېرو، د سولې عالي شورا مشر کريم خليلي گډون کړى.

د مسکو د افغانانو لومړځ ناسته درې میاشتې وړاندې وشوه، خو د قطر په دوحه کې پلان شوې دویمه ناسته د ګډونوالو په نوملړ د اختلاف له کبله ونه شوه.

د مسکو په دې غونډه کې د سولې عالي شورا مشر او ملا عبدالغني برادر ګډون د خلکو تر منځ د ښو پایلو په اړه هیلې هم څه زیاتې کړې دي.

په پام کې ده چې په نننۍ ناسته کې قطر کې د هغې غونډې پر اجنډا خبرې وشي، چې مخکې لغوه شوې وه، اوس هڅه دا ده چې په قطر کې هم باید د مسکو غونډې ته ورته بین الافغاني ناسته جوړه شي.

د اوربند وړاندیز

اټکل دا دی چې له افغانستانه ورغلی پلاوی په نننۍ غونډه کې، چې د تړلو دروازو ترشا به ترسره شي، د اوربند وړاندیز وکړي او طالبان پر دې قانع کړي چې د افغانستان د سولې بهیر او یوې هوکړې ته رسېدل له اوربند پرته ناشوني دي.

خو طالبان تر ډېره له افغانستانه د بهرنیو ځواکونو پر وتلو ټینګار لري او همدا د سولې مانع هم بولي.

د انځور حقوق Getty Images
Image caption ملا برادر: د سولې لپاره باید لومړی د افغانستان "اشغال" ختم شي

تېره ورځ د عمومي غونډې پیل په ژوندۍ بڼه ځینو رسنیو خپور کړ، چې د طالبانو د تحریک مرستیال ملا عبدالغني برادر هم په لومړي ځل په وېډیو کې راڅرګند شو.

د تېرې ورځې تر عمومي غونډې وروسته د تړلو دروازو ترشا غونډې دوام درلود او تېره شپه هم د افغان پلاوي او د طالب استازو ترمنځ یوه تعارفي ناسته شوې وه.

د پلاوي د کچې له اړخه دا تر ټولو جګپوړې غونډه ګڼل کېږي، ځکه چې د پخوانۍ غونډې پرتله د طالبانو پلاوی توپیر لري.

پرونۍ غونډه کې د طالبانو د تحریک یو بنسټګر ملا عبدالغني برادر هم ګډون لاره، چې اوس د طالبانو د تحریک مرستیال او په سیاسي چارو کې د طالبانو د مشر مرستیال هم دی.

د طالبانو په دې ۱۴ کسیز پلاوي کې ۹ یې د طالبانو د مذاکراتي ټیم غړي دي او څلور نور یې د طالبانو د مذاکراتي دفتر غړي دي، خو د مذاکراتو د ټیم غړي نه دي او څلورم کس په خپله ملا عبدالغني برادر دی.

د انځور حقوق Getty Images
Image caption په دې غونډه کې د روسیې د بهرنیو چارو وزیر سرګي لاوروف هم ګډون کړی دی.

له کابله تللي ۲۴ کسیزه پلاوی هم د تېرې غونډې پرتله ډېر توپیر لري او ښکاري چې هلته د هر ګوند په استازیتوب یو کس استولی دی، چې دوې پکې ښځې دي.

دا غونډه د افغانستان او روسیې ترمنځ د کلتوري اړیکو د ۱۰۰ کلونو پوره کېدو په پلمه جوړه شوې ده. روسیه له افغانستان سره شاوخوا شپږ سوه کاله پخواني اړیکي لري، چې د تیموریانو د واکمنۍ پرمهال د روسیې سفیران اوسني افغانستان ته راغلي دي.

د ۱۷۶۰ مو کلونو په پیل کې د احمد شاه بابا د واکمنۍ پرمهال هم د روسیې لومړنی سفیر افغانستان ته راغلی و، چې له افغانستان سره دیپلوماتیک اړیکي جوړ کړي.

په وروستیو له طالبانو سره د روسیې اړیکې ښې شوې، چې مخکې یې اړیکې ورسره نه وې.

په ۱۹۹۰مو کلونو کې د کورنیو جګړو پرمهال روسیې د طالبانو د مخالف لوري شمالي ټلوالې ملاتړ کاوه.

په دې وسیله کې د غږ اوريدل او ویډیو لیدنه شونې نه ده.
ملا برادر په لومړي ځل رسنیو ته راڅرګند شو

ورته مطالب