جلال اباد کې ځانمرګی برید؛ لږ تر لږه ۹ کسان وژل شوي دي

ننګرهار
Image caption رپوټونه وایي چې دا برید د شپږمې ناحیې اړوند سیمه کې شوی دی

د ننګرهار ولایت مرکز مرکز جلال اباد ښار کې نن پنجشنبه یوه خانمرګي برید د پنځه ملکي کسانو په ګډون لږ تر لږه ۹ کسان وژلي او ۱۲ نور یې ټپیان کړي دي. رپوټونه وایي چې دا برید پر سیمه ییزو پولیسو شوی دی.

برید د جلال اباد ښار په شپږمه ناحیه کې شوی. تر دې دمه چا د برید مسوولیت نه دی منلی، خو هلته ډېری بریدونه د داعش ډلې لخوا کېږي.

چارواکي وايي، ځانمرګی پلی و او کله چې له سيمې د چپرهار د سيمه یيزو پوليسو رنيجر ډوله موټر تېرېده ځان پورې تړلي چاودېدونکي توکي يې چولي دي.

د ننګرهار پوليسو ویاند فريد خان وايي، ځانمرګی بريد مازدیګر مهال څه کم ۴ بجې د ښار شپږمې ناحیې اړوند فامیليو چوک ته څېرمه د چپرهار د سيمه یيزو پوليسو پر رينجر ډوله موټر شوی دی.

د ننګرهار د والي وياند عطاء الله خوږیاڼی وایي، پېښه کې د مرګ ژوبلې خبره تائيدوي، خو دا نه وایي چې قربانیان څوک دي.

د جلال اباد ښار مرکزي روغتون چارواکي وایي، په ۱۲ ور وړل شويو ژوبلو کې ۳ یې کوچنيان دي. په روغتون کې د ۳ نورو ژوبلو وضيعت نازک بلل شوی دی.

Image caption برید کې ګڼ شمېر کسانو ته مرګ ژوبله اوښټې ده

تېره اپریل میاشت کې جلال اباد ښار کې پرلپسې درې ورځو چاودنو د خلکو اندېښنې لاپسې ډېرې کړې. ځايي چارواکو هغه مهال ویلي وو، د وضيعت د ښه کېدو لپاره کرځنده ګزمي ډېروي.

د تېرې مې نیمايي کې د جلال اباد تالاشۍ څلور لاري ته څېرمه ماښام روژه ماتي مهال پرلپسې ۴ چاودنو ۴ولسي کسان ووژل او ۲۰ نور يې ژوبل کړل.

جلال اباد د افغانستان يو له ګڼ مېشتو ښارونو دی، او په دې تېرو کلونو کې د داعش ډلې هلته د څو خونړیو بریدونو مسوولیت منلی دی. تېر کال د امنیت د ښه والي لپاره د دې ښار امنیتي مسوولیت افغان پوځ ته سپارل شوی و.

له څو کلونو راهیسې د اوړي په رارسېدو سره په دې ښار او د ننګرهار په ولسوالیو کې د جګړې او ناامنيو څپه هم تودېږي. تېرکال هم په همدې ورځو کې داعش وسله والو د دې ښار پر ګڼو ملکي ادارو ډله ييز وسله وال بريدونه زيات کړل.

ورته مطالب