کرېکټ نړیوال جام: افغان کرېکټ لوبډله هېواد ته ستنه شوه

کرېکټ د انځور حقوق Afghanistan Cricket Board

د افغانستان کرېکټ ملي لوبډلې غړي برتانیا کې د ۲۰۱۹ کال کرېکټ نړیوال جام سیالیو کې له ګډون وروسته له هیڅ یوې بریا موندلو پرته نن (شنبه جولای پنځمه) هېواد ته ستانه شول.

دوی به تر یوې میاشتې خپلو کورونو ته ځي او ارام به کوي خو له هغې وروسته به یو شمېر کورنۍ لوبې چې شپږیزه ټورنمنټ دی هغه به پیلېږي او وروسته به له بنګله دېش او زیمبابوې سره شل اوریزو لوبو کې مخامخ کېږي.

افغانستان د نړیوال جام سیالیو کې خپله وروستۍ لوبه ویسټ انډیز ته په ۲۳ منډو بایلوده.

افغانستان دغو سیالیو کې که څه هم د بري ارمان پوره نه کړ، خو ځینې خورا په زړه پورې لوبې یې وکړې او بریا ته ډېر نژدې شول، خو که یوه لور ته بخت ورسره یاري و نه کړه، نو بل لور ته یې لږ تجربه هم د لارې خنډ شوه.

کرېکټ نړیوال جام: ویسټ انډیز افغانستان ته په ۲۳ منډو ماتې ورکړه

کرېکټ نړیوال جام: هند افغانستان ته په ۱۱ منډو ماتې ورکړه

د افغانستان کرېکټ بورډ کې نوي بدلونونه اعلان شول

دې سره هم افغان لوبغاړو د لوبې مینه والو زړونه او د مبصرینو ستاینې وګټل. د کرېکټ نړیوالو ماهرینو برالا ویل، چې په جدول کې د افغان کرېکټ لوبډلې ځاى ځايګى تر ټولو وروسته و خو دغې بې تجربې لوبډلې د نړۍ يو شمېر ستر ټيمونه محتاط کړل.

افغان لوبغاړو بي بي سي ته وویل، خپلې نیمګړتیاوې یې حس کړې او په دې پوه شول چې کومې کومې نيمګړتیاوې یې لرلې چې په راتلونکې کې دوی پرې کار وکړي چې تر ډېره یې د خپل فیټنیس په اړه ټینګار کړی.

د انځور حقوق Getty Images
Image caption افغان لوبډلې که څه هم د نړیوال جام سیالیو کې کومه بریا و نه مونده، خو د کرېکټ مینه والو او ډېرو ماهرینو زړونه یې وګټل

د جون پر ۲۲ له هند سره افغان لوبډلې خورا په زړه پورې سیالي وکړه او افغان بالرانو هند لوبډله یوازې تر ۲۲۴ منډو پورې محدوده کړه. د دغې لوبې له پیله د افغان سپنرانو فشار څرګند معلومیده.

سپین بالرانو له ټولو پنځوسو نه څلور دېرش اوورونه وکړل، پنځه وېکټې یې تر لاسه کړې او یوازې ۱۱۹ منډې یې ورکړې. په وروستي اوور کې هغه لوبه هند د محمود شامي هټ ټریک په مټ د ۱۱ منډو په توپیر سره وګټله.

دغه راز له شري لنکا سره د لوبې لومړیو کې داسې ګومان کېده، چې شري لنکا لوبډله به افغانستان ته دروند هدف وټاکي، خو افغان بالرانو د ۲۰۱ منډو له جوړولو وروسته شري لنکا لوبډله له میدانه بهر کړه.

د نړیوال جام ډېرو سیالیو کې او په ځانګړې توګه له پاکستان سره د افغانستان سیالۍ کې افغان سپن بالران خورا کامیاب ثابت شول او یو مهال داسې ښکاریده، چې پاکستان بایلود ته ډېر نژدې شوی و، خو بیا پاکستاني لوبغاړي عماد وسیم په ځېرکتیا سره د لوبډلمشر ګلبدین نایب له یوه اووره داسې ګټه پورته کړه، چې ټوله لوبه په بله واوښته.

د انځور حقوق Afghanistan Cricket Board

راتلونکي پلانونه

افغان کرېکټ چارواکي وايي، د روان کال نومبر کې به افغان لوبډله له ویسټ انډیز سره درې شل اوریزې، درې یوه ورځنۍ او یوه ټیسټ لوبه کوي.

د افغانستان کرېکټ بورډ په یوه اعلامیه کې ویل شوي، دغه لوبې به د افغانستان په کوربتوب هند کې کېږي.

دغه سیالۍ به د نومبر له پنځمې پیل شي او د دسمبر تر لومړۍ نېټې به روانې وي.

د کرېکټ بورډ اعلامیه زیاتوي، ملي لوبډله به د روان کال په سپټمبر میاشت کې د بنګله دېش پر وړاندې یوه ټېسټ لوبه او دغه راز د افغانستان، بنګله دېش او زمبابوې لوبډلو ترمنځ د نړیوالو شل اوریزو سیالیو درې اړخیزه لوبو لوبلړۍ کې هم ګډون وکړي.