خلیلزاد: له بین الافغاني خبرو پیلېدو سره سم باید دایمي اوربند پیل شي

زلمی خلیلزاد د انځور حقوق U.S. SPECIAL REPRESENTATIVE ZALMAY KHALILZAD
Image caption زلمی خلیلزاد وايي، ټولې خواوې سولې بهیر کې چټک پرمختګ غواړي

د افغان سولې لپاره د امریکا ځانګړی استازی زلمی خلیلزاد وايي، د افغان سولې په تړاو چین کې د جوړې شوې غونډې ګډونوالو هوکړه کړې چې طالبان، افغان حکومت او نور افغانان ژر بین الافغاني خبرې پيل کړي.

بیجینګ کې جوړه شوې غونډه کې چې د تېر اپریل مسکو درې اړخیزې ناستې لړۍ ده، د امریکا چین، روسیې او پاکستان استازو ګډون کړی و، چې د خلیلزاد په وینا، په دې ناسته کې د تاوتریخوالي پر کمېدا او د افغان حکومت او طالبانو ترمنځ پر مخامخ خبرو ټینګار شوی.

زلمي خلیلزاد په دې ناسته کې د شوې هوکړې په تړاو پر خپل ټویټر لیکلي:

"موږ موافقه وکړه چې د طالبانو، افغان حکومت، او نورو افغانانو تر منځ بین الافغاني مذاکرات باید سمدستي پیل شي؛ دا مذاکرات باید ژر تر ژره د سولې یو چوکاټ وړاندې کړي او د راتلونکې لپاره یو داسې همه شموله سیاسي طرح وړاندې کړي چې ټولو افغانانو ته د منلو وړ وي".

زلمی خلیلزاد په خپل ټویټ کې وايي، ګډونوال سره سلا شول چې اړتیا ده تاوتریخوالی همدا اوس کم او یو اړخیز او تلپاتې اوربند د افغانانو له خپلمنځیو خبرو سره یوځای پیل شي.

بیجینګ کې جوړه شوې دغه ناسته د مسکو د درې اړخیزې غونډې دوام و، چې په تېره اپرېل میاشت کې جوړه شوې وه.

خو له پخوانۍ ناستې سره ددې غونډې توپیر په دې کې و چې وروسته د پاکتسان استازی هم په کې شریک شو.

ددغو څلورو هېوادونو په یوه ګډه اعلامیه کې راغلي، چې د سلا مشورو بهیر به روان ساتي او د درې اړخیزې ناستې پر بنسټ چې تېره اپرېل میاشت مسکو کې ورباندې هوکړه شوې، نورو مهمو غاړو ته به هم راتلونکې ناسته کې د ګډون بلنه ورکول کېږي.

خلیلزاد پر خپل ټویټر لیکلي: "پرون مو د چین او روسیې سره د افغانستان د سولې په اړه درې اړخیزه غونډه لرله. په دې غونډه کې پاکستان هم د څه وخت لپاره ګډون وکړ".

ورته مطالب