پېښور کې د افغان بیرغ پورته کوونکی خوشې شوی

  • 18 اګست 2019 - 27 زمری 1398
افغان ځوان د انځور حقوق Atif Mashal

خیبر پښتونخوا کې هغه افغان زلمی بېرته خوشې شوی چې د پېښور په بورډ بازار کې د پاکستان د خپلواکۍ په جشن کې یې د افغانستان بیرغ پورته کړی و. ددې کار له امله هغه څو ورځې وړاندې نیول شوی و.

یوې پاکستانۍ ورځپاڼې ویلي، نعمت الله د پیښور یوې محکمې د ۹۰زرو کلدارو په ضمانت خوشې کړی.

د نوموړي مدافع وکیل، سلیم شاه هوتي ورځپاڼې ته ویلي، د سیمې د پولیسو افسر نشو کولای چې د هغه دوسیه رسمي کړې، ځکه د قانون په بنسټ دا واک یوازې سیمه ییز مرکزي حکومت لري چې دده پروړاندې دوسیه پرانیزي.

افغان زلمی نعمت الله چې د اګسټ په ۱۴مه یې د پېښور په بور‌‌‌‌‌‌ډ بازار کې په لویه دړه د افغانستان بیرغ لګولی و، وروسته د پاکستان پولیسو نیولی او زندان ته یې بیولی و.

پېښور پولیسو افغان ځوان د افغانستان بیرغ کارولو په جرم نیولی

"محسن دوړ او علي وزیر د ترهګرو په زندان کې ساتل کېږي"

د کوټې لیاقت بازار کې چاودنې لږ تر لږه ۴ کسان وژلي

په پاکستان کې د افغانستان سفارت وايي، دوی د پرلپسې هڅو وروسته نوموړی د دغه هېواد له مرکزي زندان نه رسما خوشې کړی دی او خپلې کورنۍ ته یې سپارلی.

پاکستان کې د افغانستان د سفارت چارواکي وايي، نوموړي له افغانستان سره د سپېڅلې مینې له امله د هېواد ملي بیرغ په پېښورښار کې زړولی و او هېڅ کوم بل هدف یې نه درلود.

پېښور کې د بي بي سي خبریال رحمان الله ویلي و چې پولیسو د نعمت الله خلاف دوسیه ثبت کړې او د هغه لګولی بېرغ یې ښکته کړی دی.

د انځور حقوق Getty Images

پر خواله رسنیو د دغه افغان تصویر خپرونکو ویلي چې افغان بیرغ د بورډ بازار سیمه کې پر یوه سوداګریزه لوحه ټومبل شوی و.

ځايي پولیسو ادعا کړې چې دغه ځوان د افغان سوداګرو او ځايي خلکو تر منځ اختلاف ته د لمن وهلو هڅه کړې او ځکه یې نیولی و.