غني: د افغانستان ځینې ګاونډیان د ناپيېلتوب اصول نه مراعتوي

غونډه د انځور حقوق ARG
Image caption سږ کال اذربایجان د ناپيېلتوب غورځنګ د ولسمشریزې غونډې کوربه و

د ناپيېلیو هېوادونو سرمشریزه کې د وینا پر مهال افغان ولسمشر محمد اشرف غني وویل، د افغانستان یو شمېر ګاونډي هېوادونه د ناپیېلیتوب اصول تر پښو لاندې کوي. دغه سازمان د سړې جګړې د اوج پر مهال ۱۹۶۱ کال کې د یوګوسلاویا پلازمېنه بلګراد کې رامنځته شو او مهم اصول یې د یوه بل د خاوري تمامیت ته درناوی، شریکې ګټې او برابري، د یوه بل پر خاوره له یرغل کولو ډډه کول، سوله ییز او ګډ ژوند او د یوه بل په کورنیو چارو کې نه لاسوهنه بلل شوي.

د دغه سازمان تازه غونډه په اذربایجان کې شوې. ولسمشر غني که څه هم رسماً د کوم هېواد نوم یاد نه کړ، خو له دې مخکې کابل بیا بیا پر پاکستان تور پورې کړی چې د افغان دولت وسله والو مخالفانو ته یې پناه ورکړې، روزنه ورکوي او ملاتړ یې کوي، خو پاکستان بیا بیا دغه ادعا رد کړې ده.

غني: د پاکستان ګټه له افغانستان سره په همکارۍ کې ده

ولسمشر غني: ګاونډیان دې د بندونو له جوړېدو نه اندېښمنېږي

ولسمشر غني وايي، دې سرغړونو ته په پام سره باید د ناپيېلتوب او مثتبتې بې طرفۍ تعریف له سره وشي، چې ټولیزې ګټې خوندي شي او د ولسونو راتلونکی خوندي پاتې شي.

ښاغلی غني وايي که وسله وال طالبانو او پلویانو یې چې ''دوی ته پټنځایونه ورکوي، ملاتړ یې کوي، زموږ د سولې وړاندیز منلی وای، په افغانستان کې د بهرنیو ځواکونو شمېر کم او شتون ته به یې اړتیا ته پاتې کېده. ''

ولسمشر غني زیاته کړه، حکومت د ټولیز امنیت مسئولیت لري او 'په دې لار کې ' د افغانستان له ۳۵ زره ډېر رضاکار او اتل سرتېري وژل شوي '' چې په وینا یې د افغانستان له ازادۍ، عزت او اساسي قانون ساتنه کوي.

د انځور حقوق ARG

ښاغلي غني وویل، ''پټنځایونو، مخدره موادو او له ترهګرو ډلو سره د طالبانو اړیکو '' په نړیواله کچه دوی ته د فعالیت زمینه برابره کړې ده.

د نوموړي په خبره همدغه تګلاره د دې لامل شوې چې طالبانو ''په افغانستان کې د ملکي خلکو ډله ییزه پلان شوې وژنه پیل کړې او د تاوتریخوالي تفکر خپرولو او ورانکارۍ له لارې غواړي موږ له منځه یوسي. ''

ولسمشر غني دغه راز د ''مجرمانه اقتصاد '' او په ځانګړې توګه د پولو په اوږدو کې د مخدره موادو کارځایونه یو بل ګواښ وبلل چې په وینا د نړۍ په لر او بر کې مخامخ د ځوان کول او کورنیو پر نیکمرغۍ او سوکالۍ ناوړه اغېز کوي.