طالبان: امریکا زموږ د مرکچیانو لوژستیکي لګښتونه نه دي ورکړي

د انځور حقوق Getty Images
Image caption طالبانو ویلي، د امریکا دغه بودیجه د افغان سولې په برخه کې د خپل لوري لپاره تصویب شوې

په قطر کې د افغان طالبانو سیاسي دفتر هغه رپوټونه بې بنسټه بللي، چې ګواکې د امریکا کانګرس د دوی د مرکچیانو لوژستیکي لګښت لپاره بودیجه تصویب کړې ده.

د رول کال (Roll call) په نامه یوې رسنۍ په رپوټ کې ویل شوي، د امریکا کانګرس د دغه هېواد د دفاع وزارت یا پنټاګان هغه طرح تائید کړې چې له مخې به یې امریکا د افغان سولې پر بهیر ۱۵ میلیونه ډالر لګوي.

رپوټ کې راغلي، دا هم شونې ده چې د دې بودیجې څه نا څه برخه ښایي د وسله والو طالبانو جېب ته هم ورسېږي.

خو طالبانو ویلي، د امریکا دغه بودیجه د افغان سولې په برخه کې د خپل لوري لپاره تصویب شوې او له دوی سره هېڅ اړه نه لري.

طالبان: د سولې خبرې زموږ په غوښتنه ځنډول شوې

د طالبانو د قطر دفتر تړل کېدو په اړه پر غني د ټرمپ فشار

په قطر کې د طالبانو د سیاسي دفتر ویاند سهیل شاهین د امریکا کانګرس له خوا د دوی د لګښتونو لپاره د طرحې تصویبول دروغ او د امریکایانو تش تبلیغات بللي.

د رول کال په راپور کې ویل شوي، د امریکا د کانګړس غړو د داسې ډاډ له ترلاسه کولو وروسته چې طالبان به مخامخ له یادو پیسو نه برخمن کېږي، د افغان سولې د لګښټونو په برخه کې د امریکا دفاع وزارت دغه طرحه تصویب کړه.

دغه رسنۍ، چې تر ډېره پورې د امریکا د کانګرس اړوند موضوعات خپروي، په خپل رپوټ کې وايي، شونې ده چې د دغو پیسو یوه برخه به د طالب مرکچیانو د اوسېدوځای، ډوډۍ، تګ او راتګ او په یو شمېر نورو برخو کې ولګول شي.

که څه هم ځینې شنونکي د دواوړو جنګي لوریو تر منځ د ۱۸ کلنې جګړې پای ته رسولو لړ کې ۱۵ میلیونه ډالره لږ پیسې بولي، خو د امریکا د کانګرس یو شمېرغړي لا هم اندېښنه لري چې کېدای شي دغه پیسې د طالبانو په ګټه او د امریکا په زیان تمامې شي.

قطر کې د طالبانو د سیاسي دفتر ویاند سهیل شاهین پر خپله ټویټر پاڼه لیکلي، که چېرې امریکایانو د خپلې مرکچي ډلې لپاره بودیجه تصویب کړې وې، دا د هغوی خپل کار دی او په طالبانو پورې اړه نه لري.

یوې باوري سرچینې بیا بي بي سي ته ویلي، په قطر کې د طالبانو د سیاسي دفتر اوسنی لګښت کوربه هېواد قطر ور کوي.

په تېر نژدې یوه کال کې امریکایي دیپلوماتانو او طالب استازو د قطر په مرکز دوحه کې د افغان سولې د خبرو بهیر کې لس ځله خبرې کړې دي.

وروستي پړاو خبرې یې په ظاهره په افغانستان کې د امریکايي سرتېرو تر ټولو لویې اډې بګرام باندې د طالبانو د برید له امله وځنډول شوې.