افغان ټاکنې؛ د لومړنیو پایلو په اړه دوه ورځو کې ۷ زره شکایتونه ثبت شوي

د ټاکنیزو شکایتونو کمېسیون چارشنبې د ورځې ترپایه د شکایتونو ثبت ته دوام ورکوي

د عکس سرچینه، Anadolu Agency/Getty Images

د عکس تشریح،

د ټاکنیزو شکایتونو کمېسیون چارشنبې د ورځې ترپایه د شکایتونو ثبت ته دوام ورکوي

د افغانستان د ټاکنیزو شکایتونو کمېسیون وایي، په تېرو دوه ورځو کې د افغانستان د ولسمشرۍ ټاکنو د لومړنیو پایلو په اړه له دوی سره کابو ۷ زره شکایتونه ثبت شوي دي. د شکایتونو د ثبتولو چاره به د چارشنبې ورځې تر پایه دوام کوي او تمه کېږي چې دا شمېر لا ډېر شي.

د محمد اشرف غني په مشرۍ د دولت جوړونې ټاکنډلې نن سې شنبه د ټاکنیزو شکایتونو کمیسیون د کابل دفتر ته ۱۲ سوه شکایتونه وړاندې کړل.

دغه ټاکنډله وایي چې سبا به هم له دې زیات شمیر شکایتونه د څیړنې لپاره همدې کمیسیون ته وسپاري.

د د دولت جوړونې ټاکنډلې یوه غړي اجمل هوډمن بي بي سي ته وویل، شکایتونه یې تر ډېره هغو رایو ته د باور ورکولو په اړه دي چې د ده په ټکو، ټاکنو کمېسیون بې اعتباره بللې دي.

له دې وړاندې د دوشنبې پر ورځ یاد کمېسیون ویلي وو چې د عبدالله عبدالله په مشرۍ د ثبات او همپالنې ډلې لخوا یې هم تلس سوه شکایتونه ثبت کړي دي.

خو شکایتونو کمېسیون یو کمېشنر بي بي سي ته ویلي وو چې د دې ډلې ډېری شکایتونه د لومړنیو پایلو په اړه نه دي، بلکې د ټاکنو د لومړنیو پړاوونو په تړاو دي.

له کمېسون سره د ثبت شویو شکایتونو لویه برخه د عبدالله عبدالله په مشرۍ د ثبات او همپالنې ټاکنډلې، بیا د محمد اشرف غني او بیا هم د رحمت الله نبیل په مشرۍ د امنیت او عدالت ټاکنډلې دي.

د ټاکنیزو شکایتونو کمېسیون چارواکي وایي، د شکایتونو شمېر ډېر دی، خو په وینا یې هڅه کوي چې په ټاکلې موده کې یې څیړنه بشپړه کړي.

د عکس سرچینه، Ahmad Wali Massoud/Facebook

د عکس تشریح،

د ولسمشریزو ټاکنو د نوماندانو شورا چې ۷ نوماندان یې تر چتر لاندې راټول دي وايي، د ټاکنو لومړنۍ پایلې نه مني.

د ټاکنیزو شکایتونو کمېسیون چارشنبې د ورځې ترپایه د شکایتونو ثبت ته دوام ورکوي او بیا د قانون له مخې پنځلس ورځې وخت لري چې دا وڅېړي او پایله یې ټاکنو کمېسیون ته وسپاري.

د هر ولایت د رایو په اړه شکایتونه د هماغه ولایت د ټاکنیزو شکایتونو کمېسیون څانګې ته راجع کېږي او هلته یې په اړه پرېکړه کېږي.

که کومه ټاکنیزه ډله د ولایتي مسئولینو په پریکړو اعتراض ولري، کابل کې د استیناف غوښتنه کولای شي.

بل لورته د ولسمشریزو ټاکنو د نوماندانو شورا چې ۷ نوماندان یې تر چتر لاندې راټول دي وايي، د ټاکنو لومړنۍ پایلې نه مني.

دغه نوماندان چې ټاکنو کې یې له لس سلنې کمې رایې وړي او یو میلیون افغانۍ جریمه شوي هم دي، د ملي مشارکت حکومت د جوړېدو غوښتنه کوي.

دغې شورا یو پریکړه لیک خپور کړ چې په کې ویل شوي، دوی ټاکنیزو شکایتونو کمېسیون ته هیڅ شکایت نه کوي ځکه چې باور نه پرې لري.