هلمند کې یوې ښځې په یوه وخت پنځه ماشومان زېږولي

هلمند د انځور حقوق Qamer Niazi

د افغانستان په سویلي هلمند ولایت کې د یوې مېرمن پنځه ماشومان په یوه وخت زېږېدلي دي. په نویو زېږېدلو ماشومانو کې څلور نجونې او یو هلک شامل دي.

د ښځو چارو کې د هلمند والي سلاکاره قمر نیازۍ چې د دې ماشومانو لیدو ته ورغلې وه، بي بي سي سره خبرو کې وویل، روغتیاپالانو د مور او ماشومانو روغتیايي حالت ډاډمن بللی دی.

"افغانستان د ټیټ عمره ماشومانو د مړینې له اړخه دریم هېواد دی"

یونيسف: افغانستان کې ۲ میلیونه ماشومان په خوارځواکۍ اخته دي

د نوموړې په وینا دغه ماشومان له وخته مخکې او د مېندوارۍ پر اوومه میاشت زېږېدلي او دا مهال د لشکرګاه بست روغتون د ځانګړې پاملرنې څانګه کې ساتل کېږي.

د نوموړې په خبره د نویو زېږېدلو کوچنیانو مور د مېندوارۍ پر مهال هېڅ ډول روغتیایي معاینات نه دي ترسره کړي، ځکه نه وه خبره، چې په بطن کې یې پنځه کوچنیان دي.

د دغې ښځې له دې مخکې هم دوه کوچنیان زېږولي و، چې ویل کېږي یو هلک او یوه نجلۍ وه.

د انځور حقوق Qamer Niazi

د نویو زېږیدلو کوچنیانو پلار بزګر دی او له خپلې کورنۍ سره د هلمند مرکز لښکرګاه په یوه څنډه کې اوسېږي.

هلمند کې روغتیاپالان وایي په دغه ولایت کې لا هم ګڼې کورنۍ د مېندواري پر مهال روغتیایې مرکزونو ته نه ځي، چې دغه چاره په یاد ولایت کې د مور او ماشوم ژوند ګواښي.