افغان ټاکنې: غني ته مبارکۍ، خو د عبدالله اعتراض

ټاکنې د انځور حقوق ARG/ ABDULLAH FACEBOOK
Image caption د ټاکنو کمېسیون محمد اشرف غني بریالی اعلان کړی، خو عبدالله عبدالله وایي چې ټاکنې ده ګټلې دي

د افغانستان د ولسمشریزو ټاکنو د وروستیو پایلو اعلان وروسته اجرائيه رئیس عبدالله عبدالله نن پنجشنبه په یوه اعتراضیه لیک کې له اروپايي ټولنې د ده ټاکنیز سیال محمد اشرف غني ته د بریا مبارکۍ په تړاو د وضاحت غوښتنه کړې.

د اروپايي ټولنې د بهرنیو چارو استازي پرون چارشنبه پر تیلیفون ولسمشر محمد اشرف غني ته د بیا ځل ټاکل کېدو مبارکي ورکړې وه.

خو اجرائیه رئیس عبدالله عبدالله د اروپايي ټولنې لخوا ولسمشر محمد اشرف غني ته د بریا مبارکي حیرانوونکې بللې ده او لیکلي یې دي چې د درغلي کوونکې ډلې په ملاتړ یې د مبارکي پیغام ورکړی.

هغه د اروپايي ټولنې دا کار د افغانستان د خلکو د غوښتنې خلاف بللی دی.

له دې سره سم نن پنجشنبه په یو شمېر ولایتونو کې د محمد اشرف غني او عبدالله عبدالله ملاتړو د بریا جلا جلا جشنونه نیولي وو.

د عبدالله عبدالله ملاتړو نن پنجشنبه په تخار، هرات، فاریاب، کاپیسا او پنجشیر ولایتونو کې د هغه څه په اړه چې دوی یې د ثبات او همپالنې ټاکنیزې ډلې بریا بولي، جشنونه نیولي وو.

د انځور حقوق MOHAQEQ FACEBOOK
Image caption تخار کې د عبدالله عبدالله په ملاتړ خلک راوتلي وو

ها خوا په پکتیکا ولایت کې ګڼ شمېر خلکو په ټاکنو کې د محمد اشرف غني بریا په ډول او اتڼونو ولمانځله.

له دې سره سم په ولسمشرۍ ماڼۍ کې د ولسمشر د لوړې مراسمو پر څرنګوالي او چمتوالي بحثونه روان دي.

له دې سره یو ځای د ولسمشریزو ټاکنو د نوماندانو شورا په اعتراضیه غونډه کې د ولسمشریزو ټاکنو د ورستیو پایلو د اعلان په غبرګون کې ویلي دي چې دوی ته د منلو وړ نه دي.

د ټاکنو د پایلو ته د غبرګونونو په لړ کې د هند د بهرنیو چارو وزارت په یوه خبرپاڼه کې د افغانستان د ولسمشر په توګه اشرف غني ته د هغه د بیا ټاکل کېدو له امله مبارکي ورکړې.

په خبرپاڼه کې دا هم ویل شوي چې هند به له نوي افغان حکومت سره ګډ کار کولو ته ژمن وي.

د انځور حقوق NABI ZIARMAL FACEBOOK
Image caption په پکتیکا کې بیا خلکو د محمد اشرف غني بریا ولمانځله

له دې سره یو ځای د کویټ امیر او د دغه هېواد ولعهد دواړو ولسمشر محمد اشرف غني ته د بیا ځل ولسمشر کېدو د مبارکۍ پیغام استولې ده.

امریکا چې د افغان دولت لوی ملاتړی هېواد بلل کېږي، تر اوسه یې د ټاکنو د وروستیو پایلو د اعلان په غبرګون کې څه ندي ویلي.

خو د امریکا د مشرانو جرګې یوه مخکښ غړي لېنزي ګراهم ولسمشر محمد اشرف غني ته د دویم ځل لپاره د ولسمشر کېدو مبارکي ویلې ده.

ورته مطالب