ارګ: د قطر امیر له طالبانو غوښتي چې افغان حکومت د افغان ملت استازي په توګه ومني

سوله

د عکس سرچینه، ARG

د عکس تشریح،

د قطر امیر او افغان ولسمشر پر سوله غږېدلي دي

د افغان ولسمشر دفتر وايي نن ( سې شنبه ۳ مارچ ) د قطر امیر تمیم بن حمد آل ثاني له ولسمشر محمد اشرف غني سره په تیلیفوني خبرو کې ډاډ څرګند کړی چې هېواد یې د افغان سولې په برخه کې هر ډول مرستې ته چمتو دی.

د ارګ د وینا پاڼې له مخې د قطر امیر ویلي چې طالبانو سره یې لیدلي او دا یې ورته په ډاګه کړې چې افغانستان اوس د شل کاله وړاندې افغانستان نه دی او نوي واقعیتونه رامنځته شوي. وینا پاڼه زیاتوي د قطر امیر طالبانو ته ویلي چې له نویو واقعیتونو یو دا دی چې "اوس په افغانستان کې یو مشروع ټاکل شوی حکومت دی او طالبان باید دا ومني افغان حکومت د خپل ملت استازولي کوي. "

ارګ وايي چې د قطر امیر په دې تیلیفوني خبرو کې د طالبانو غوښتنو ته هم اشاره وکړه چې د سولې خبرو پرمهال به پرې خبرې وشي.

قطر د تېر شاوخوا یو نیم کال په موده کې د امریکا او طالبانو ترمنځ د سولې خبرو کوربه و. د امریکا او طالبانو ترمنځ هوکړه د فبرورۍ میاشتې پر ۲۹مه نېټه په دوحه کې لاسلیک شوه.

همدا اوس د افغان حکومت یو پلاوی په قطر کې دی چې د مقدماتي تماس پلاوی نومول شوی. خو طالبان وایي چې له دې بشپړ پلاوی سره نه ګوري او یوازې د بندیانو د تبادلې په اړه به د پلاوي له اړوند غړي سره خبرې کوي.