طالبان: زموږ او د امریکا ترمنځ هېڅ ډول پټ اسناد نشته

سهیل

د عکس سرچینه، Getty Images

د عکس تشریح،

سهیل شاهین له امریکایانو غوښتي چې د هوکړې ټولې برخې عملي کړي

وسله والو طالبانو ویلي، له امریکا سره هېڅ ډول پټ تړون نه لري، بلکې څو ورځې وړاندې د شوې هوکړې جزییات په رسنیو کې خپاره شوي او هر بند یې تشریح شوی دی. دوی وايي، "ځینې جعلي پاڼې او پروپاګند چې مغرضې کړۍ یې خپرويو هېڅ حقیقت نه لري."

په قطر کې د طالبانو دفتر ویاند سهیل شاهین که څه هم په دې اړه خپل ټویټ کې د کومې رسنۍ نوم نه دی اخیستی، خو واشنګټن پوسټ ورځپاڼې لیکلي چې د طالبانو او امریکا تړون کې دوه مادې داسې دي چې یوازې د کانګرس غړو او ځانګړو کسانو لوستي، خو له عامو خلکو پټې ساتل شوې دي.

واشنګټن پوسټ وایي په دې مادو کې پر دې مېکانېزم بحث شوی چې طالبان به څرنګه د نورو ترهګرو ډلو پر ضد فعالیت کوي او امریکایان به څرنګه د دوی دا فعالیتونه تصدیقوي.

له دې سره سم امریکایي سناتور لېنډسي ګراهم پر خپله ټوېټر پاڼه لیکلي، امریکا به افغانستان کې د ترهګرۍ ضد ځواک پرېږدي.

له دې ټویټ وروسته ګڼو کسانو دا پوښتنه را پورته کړې چې ایا طالبانو په رښتیا هم افغانستان کې د یو شمېر امریکایي ځواکونو پاتې کېدو ته غاړه اېښې.

په قطر کې د طالبانو ویاند سهیل شاهین دا هم پر خپل ټوېټر لیکلي چې، ‌دوی له امریکا سره د شوې هوکړې ټولې برخې له پلان سره سم یو په بل پسې عملي کوي چې د جګړې د شدت مخه ونیول شي.

ښاغلي شاهین دا هم لیکلي، مقابل لوری دې هم د هوکړې ټولو برخو عملي کولو کې خنډونه له منځه یوسي، تر څو سرتاسري سولې ته لاره هواره او افغان ولس له خپلو اساسي حقونو برخمن شي.

طالب ویاند په داسې حال کې دا څرګندونې کړې دي چې په افغانستان کې د بهرنیو ځواکونو یوه ویاند نن چارشنبه ومنله چې پر طالبانو یې هلمند کې هوایي برید کړی.

د امریکایې ځواکونو ویاند ساني لګیټ وایي، دغه هوایي بریدونه یې ځکه کړي چې وسله والو طالبانو په تېرو څلورویشتو ساعتونو کې د افغان ځواکونو پر پوستو ۴۳ بریدونه کړي.

ښاغلی لګیټ وايي، سولې ته ژمن دي، خو د افغان امنیتي ځواکونو دفاع د دوی مسوولیت دی.

نوموړی وايي، "طالب مشرتابه نړیوالې ټولنې ته د اورکم ژمنه کړې چې بریدونه به نه ډېروي. موږ پر طالبانو غږ کوو چې بې ګټې بریدونه ودروي او پر خپلو ژمنو ودرېږي."

د عکس سرچینه، Getty Images

د عکس تشریح،

امریکایي ځواکونو منلې چې له هوکړې وروسته یې په لومړي ځل پر طالبانو بمبار کړی

وسله والو طالبانو د دوشنبې پر ورځ بي بي سي ته وویل چې د اورکم لپاره ټاکل شوې موده پای ته رسېدلې ده او پوځي وضعیت به بېرته عادي حالت ته ستنېږي.

خو اروپایي ټولنې، ملګرو ملتونو او همدا راز امریکایي چارواکو ټینګار کړی دی چې د باور جوړولو او بین الافغاني خبرو ته د زمینې برابرولو لپاره باید اورکم دوام وکړي.

د افغانستان د کورنیو چارو وزارت هم وايي، په تېرو ۲۴ ساعتونو کې وسله والو طالبانو په ۱۵ ولایتونو کې ۳۰ بریدونه کړي دي.

د دې وزارت ویاند نصرت رحیمي رسنیو ته ویلي چې په دې بریدونو کې څلور ملکیان، ۱۱ امنیتي او دفاعي ځواکونه وژل شوي او د ملکیانو په ګډون ۱۸ امنیتي ځواکونه ټپیان شوي دي.

رحیمي زیاته کړه چې په دې بریدونو کې د وسله والو طالبانو ۱۷ تنه وژل شوي او ۱۱ نور یې ټپیان دي.

د عکس سرچینه، Getty Images / UNAMA NEWS

د عکس تشریح،

یوناما او اروپایي ټولنې ویلي، افغانستان کې اورکم باید دوام وکړي

هاخوا د افغانستان د دفاع وزارت وايي، تېره شپه ناوخته په کندوز کې د طالبانو برید ۷ افغان سرتېري وژلي.

د دې وزارت ویاند مرستیال فواد امان بي بي سي ته وویل، دا پېښه د کندوز ښار په باغ شرکت سیمه کې شوې چې له لسو زیات وسله وال طالبان هم پکې وژل شوي دي.

دی وايي امنیتي او دفاعي ځواکونه اوس تیارسۍ حالت کې دي چې د خلکو له ځان او مال څخه ساتنه وکړي او هر ډول ترورستي برید ته ځواب ووايي.