خوست او لغمان کې د دوو کورنیو ۹ غړي ووژل شول

خوست
د عکس تشریح،

ځايي خلک وايي، دې کورنۍ په پردي کور کې ژوند کاوه او له چا سره یې بدي نه لرله.

د افغانستان سوېل ختیځ ته په خوست ولایت کې امنیتي چاوراکي پولیس وایي، تېره شپه شاوخوا نهه بجې د اسماعیل خېلو او مندوزیو ولسوالۍ د چراګاه او دیګانو کلي سره نږدې پر یو کور وسله وال برید شوی، چې له امله یې د یوې کورنۍ ۷ غړي وژل شوي او دوه نور ژوبل دي.

د قومندانۍ ویاند عادل حیدر په خبره، د پېښې په قربانیانو کې مېرمنې او ماشومان هم شامل دي:

"د یوې کورنۍ اوه غړي وژل شوي دي چې دوه مېرمنې، دوه ماشومانې، د کور سرپرست او دوه هلکان دي."

دی وايي د برېد سیمې ته د پولیسو رسیدو سره سم ټپیان او مړي روغتون ته لیږدول شوي او د دې پېښې جدي پلټنې روانې دي.

ښاغلي حیدر وویل، د دې پېښې عاملان تثبیت شوي دي.

امنیه قومنداني وایي، د دوی لومړني معلومات ښیې چې پر دې کورنۍ د شخصي ستونزو له امله برید شوی دی.

خو کلیوال وایي، وژل شوې کورنۍ شخصي بدي نه لرله او په پردي کور کې یې د غربت ژوند کاوه.

هاخوا د افغانستان په ختیځ لغمان کې د کورني تاوتریخوالي له امله دوه ښځې وژل شوې او یوه ټپې شوې ده.

د لغمان د والي ویاند اسد الله دولتزی وایي، د مرکز مهترلام اړوند بابا صيب کمپ کې د خوشبين په نامه يوه کس د کورني تاوتريخوالي له امله په خپلو دوو مېرمنو او خور ډزې کړې چې له امله یې د نوموړي يوه مېرمن او خور وژل شوې او بله مېرمن یې ټپي شوې.

د نوموړي په خبره، پولیسو دا بریدګر نیولی دی.