کندهار: د ناټو ځواکونو له يوې اډې سره چاودنه شوې

Image caption تر اوسه پورې بهرنيو ځواکونو د چاودنې د څرنګوالي او زيانونو په اړه څه نه دي ويلي.

چارواکي وايي په کندهار کې د ناټو ځواکونو د يوې اډې د ګاډو په تم ځای يا پارکينګ کې دموټر بم چاودنه شوې .

دلته د هغو افغان کارګرو ګاډي درېږي چې د ننه په اډه کې دندې او کارونه لري .

عيني شاهدان چاودنه ډېره زوروره بولي او وا يي چې په پايله کې يې څو ګاډي ويجاړ شوي دي .

چارواکي وايي په دغې اډه کې کاناډايي او امريکايي سرتېري او افغان ځواکونه ګډ اوسي خو زياتوي چې په چاودنه کې چاته زيان نه دی اوښتی.

د کندهار پوليسو يوه چارواکي وويل دوی پلټنې پيل کړی چې معلومه کړي چاودنه د ځانمرګي بريد او که د ريموټ کنټرول بم په مټ شوې ده .

د کورنيو چارو وزارت په يوه ويناپاڼه کې ويلي چې له چاودېدونکو توکو ډک، يو کرولا ډوله موټر دغه پارکينګ ته ننويستل شوی و.

ويناپاڼه وايي د چاودنې په پايله کې 11 ګاډي سوځېدلي او 6 ګاډي ، 50 موټرسايکل او 20 بايسکل ويجاړ شوي دي .

طالبانو تراوسه پورې د چادونې په تړاو څه نه دي ويلي .

دغه راز نړيوالو ځواکونو هم تر دې مهاله د چاودنې په اړه څه نه دي ويلي.