ولسمشر کرزي، د ولسي افغانانو مرګ ژوبله په کلکه وغندله

کرزی د انځور حقوق Reuters
Image caption ښاغلي کرزي په افغانستان کې پر مېشتو بهرنيو ځواکونو هم له دې کبله نيوکه وکړه،چې په عملياتو کې يې همغږي نشته، ځکه ولسي وګړو ته مرګ ژوبله اړوي.

د تېرې اونۍ په ترڅ کې د افغانستان په يو شمېر ښارونو کې خورا خونړي بريدونه وشول .

ددغو پېښو په لړ کې يو هم په ختيز ولايت جلال اباد کې د کابل بانک پر سيمه ييز دفتر وسلوال بريد و چې شاوخوا څلوېښت تنه پکې ووژل شول او تر اويا زيات ژوبل شول .

بل د کونړ په غازي اباد ولسوالۍ کې د ناټو او افغان ځواکونو هوايي بريد و، چې د افغان حکومت په وينا د ښځو او ماشومانو په ګډون تر شپېته تنه زيات پکې وژل شوي ول .

افغان ولسمشر حامد کرزي پخپله اونيزه راډيويي وينا کې د جلال اباد بريد يو داسې بريد وباله چې په وينا يې په هېڅ دين کې د منلو وړ نه دی : (( دغه هېښوونکي جنايات په هېڅ دين او مذهب او دغه راز د نړۍ په هېڅ هېواد کې د منلو او توجيه وړ نه دي .

ان ددغه جنايت د محکومولو لپاره د الفاظو موندل هم سخت کار دی . خو دغه جنايتکاران اصلا څوک دي او ولې زموږ د ښځو، ماشومانو او بوډاګانو له وژلو خوند اخلي؟

ښکاره ده چې هغوی نه مسلمانان دي، نه افغانان او نه هم انسانان بلل کېدای شي . دا په اصل کې ددې خاورې د بچيانو د وژلو لپاره ګمارل شوي مزدوران دي .))

دغه راز ښاغلي کرزي وويل د ناټو او ايساف ځواکونو له لوري هم د ولسي افغانانو د مرګ ژوبلې بهير روان دی او په وينايې په عملياتو کې نه همغږي د ولسي زيانونو لامل کېږي: (( د ناټو ايساف د ځواکونو له لوري هم د ملکي افغانانو مرګ ژوبله دوام لري. موږ له اوږدې مودې راهيسې هڅه کوو چې دغه ځواکونه د ملکي وګړو له وژلو را وګرځوو.

خو د کونړ وروستۍ پېښې وښوده، چې موږ لا هم په دغه کار کې بريالي نه يو. دليل يې ددغو ځواکونو خپل سري عمليات دي چې ډېر ځله زموږ د خلکو د ژوند په بيه تمامېږي .))

دغه راز ولسمشر کرزي په افغانستان د جګړې پر ستراتيژي هم نيوکه وکړه او د ولسي خلکو زيان يې ددغې ستراتيژي د نيمګړتيا له کبله وباله .

په تېره يوه اونۍ کې د افغانستان په بېلا بېلو سيمو کې تر يو نيم سل زيات ولسي افغانان د طالبانو او ناټو ځواکونو په بريدونو کې وژل شوي دي.

اوس په افغانستان کې ناسمې امنيتي وضعې پر افغانانو سربېره د نړيوالو او نادولتي موسسو اندېښنې هم راپارولې دي.