پکتیکا کې چاودنې د ۱۲ مسافرو ژوند واخیست

پکتیکا
Image caption چاودنه د 'تروو' او 'وازه خوا' ولسوالیو ترمنځ پر غځېدلي سړک شوې ده .

د پکتیکا والي پېښه تایید کړې او امنيتي چارواکو بي بي سي ته وویل چاودنه نن سهار شاوخوا شپږ بجې د یادې ولسوالۍ په 'یوسف نری' سیمه کې هغه مهال وشوه، چې له کوټې د مسافرو یو ګاډی د تروو او وازې خوا ولسوالیو ترمنځ پر لوی غځېدلي سړک پرماین وخوت .

د افغانستان د کورنیو چارو وزارت بیا په چاودنه کې د مړو شویو کسانو شمېر لس او د ټپیانو شمېر نهه کسه ښودلی دی .

د امنيتي چارواکو په وینا، په وژل شوو کې پنځه ماشومان او پنځه سړي دي .

د چارواکو په وینا، په ټپیانو کې د ځينو روغتیايي حالت د اندېښنې دی .

د چاودنې پړه تر اوسه چا پرغاړه نه ده اخیستې .

له تېرو دوو کلونو راهیسې په پکتیکا کې دا ډول پېښې ډېرې رامنځ ته شوې دي .

په تېرو څو کلونو کې په افغانستان کې د ملکي تلفاتو شمېر پر زیاتېدو دی .

ملکي خلکو ته تر ډېره د بهرنیو ځواکونو او وسله والو ترمنځ په نښتو، عملیاتو او همداراز د ماینونو له کبله مرګ ژوبله اوړي .

د روانۍ مارچ پرلومړۍ د تېرې سه شنبې پر ورځ بهرنیو ځواکونو د کونړ په ماڼوګي ولسوالۍ کې پر ماشومانو بمبار وکړ او نهه کسه یې ووژل .

سیمه ییزو خلکو هم تایید کړې وه چې بهرنیو ځواکونو د ماڼوګۍ په ننګلام سیمه کې نن ماسپښين بمبار کړی، چې تر اوسه په کې د نهو ماشومانو د وژل کېدو او د دوو نورو د ټپي کېدو خبر ورکړل شوی دی .

څو ورځې وړاندې هم په کونړ کې بهرنیو ځواکونو بمبار کړی، چې د ماشومانو او ښځو په ګډون په کې شاوخوا ۶۰ ولسي وګړي وژل شوي ول .

که څه هم افغان ولسمشر په ټينګار له بهرنیو ځواکونو د ولسي وګړو ژوند ته د پام کولو غوښتنه کړې، خو دا په تېرو نژدې لسو ورځو کې درېیم هوايي برید دی، چې ولسي وګړي په کې وژل کېږي .

په افغانستان کې د ناټو ایساف ځواکونو عمومي قومندان جنرال ډېوېډ پيټرېیاس له بي بي سي سره په ځانګړې مرکه کې ویلي خپلو قومندانانو ته یې له سره تر ممکنه بریده د ملکي تلفاتو د مخنيوي لارښوونه کړې ده .

Image caption جنرال ډېوېډ پيټرېیاس له بي بي سي سره په ځانګړې مرکه کې ویلي خپلو قومندانانو ته یې له سره تر ممکنه بریده د ملکي تلفاتو د مخنيوي لارښوونه کړې ده

دغه امریکایي جنرال له بي بي سي سره په یوه ځانکړې مرکه کې د افغانستان د خلکو خوندیتوب د خپلو ځواکونو اساسي دنده بللې او وایي د تیر پر تله د عملیاتو پر مهال د ملکي افغانانو د مرګ ژوبلې په کچه کې د پام وړ کمی راغلی، خو دا مني چې لا هم کله- ناکله د دوی د ځواکونو په دفاعي عملیاتو کې ملکي افغانانو ته مرګ ژوبله اوړي.

په افغانستان کې د ناټو – ایساف ځواکونو د عمومي قوماندان جنرال ډېوېډ پېټرېیاس دغه څرګندونې تر ډېره د کونړ په غازي اباد ولسوالۍ کې شاوخوا لس ورځې وړاندې د ناټو په هوایي بمبارۍ کې د ښځو او ماشومانو په ګډون د لسګونه ملکي وګړو د وژل کیدو پیښې ته غبرګون وو .

ښاغلي پیټرېیاس وویل ده د یوه لارښود یا دایریکتف په ترڅ کې له خپلو قوماندانانو په کلکه غوښتي چې تر وسه وسه د ملکي تلفاتو مخنیوي ته پام وکړي.

په ټوله کې د ښاغلي پيټرېیاس انګیرنه داوه چې د تېر پر تله دا مهال د ناټو ایساف په عملیاتو کې د ملکي افغانانو د مرګ ژوبلې په کچه کې د پام وړ کمې راغلی او برعکس یې ادعا دا وه چې ګواکې ۷۰ سلنه ملکي وګړي د طالبانو په بریدونو کې وژل کېږي .

ورته مطالب