افغانستان د خپلواکۍ ۹۲مه کلیزه ولمانځله

غازي امان الله خان
Image caption د غازي امان الله خان د واکمنۍ پرمهال په ۱۹۱۹ کال له انګرېزانو د افغانستان خپلواکي ترلاسه شوه.

د افغانستان د خپلواکۍ دوه نویمه کلیزه د جمعې په ورځ یواځې د ملي دفاع وزارت ودانۍ مخې ته ونمانځل شوه. سږ کال ددغې ورځې لمانځنه د تېرو کلونو په شان په شاندارو مراسمو سره نه وه.

له انګرېزانو څخه د خپلواکۍ اخیستلو ورځ په داسې حال کې لمانځل کیږي چې ورسره جوخت د بریتانیا پر کونسلګرۍ ډله ایز بریدونه شوي دي.

سږ کال د افغانستان د خپلواکۍ ورځ له تېرو کلونو څخه ډېر توپیر درلود، د کابل ښار په واټونو کې څراغونه ، بېرغونه او د مبارکۍ پیغامونه نه لیدل کېږي.

افغان حکومت دا ورځ یواځې د ملي دفاع وزارت په انګړ کې د کلکو امنیتي تدبیرونو په نیولو سره په پیکه ډول ولمانځله.

دغو مراسمو ته افغان ولسمشر حامد کرزی، د کابینې غړي د ځینو بهرنیو هېوادونو سفیران او دیپلوماتان راغلي وو.

افغان ولسمشر حامد کرزي له خبریالانو سره په لنډو خبرو کې د افغانستان د پرمختګ او پیاوړتیا غوښتنه وکړه.

افغان چارواکو په داسې حال کې له انګریزانو د خپلواکۍ ورځ ولمانځله چې په همدې ورځ په کابل ښار کې د بریتانیا پر قونسلګرۍ ډله ایز ځانمرګي بریدونه شوي او درنه مرګ ژوبله یې اړولې.

ورته مطالب