کابل: د امريکا او طالبانو له مذاکرې سره موافق يوو

ارګ
Image caption ولسمشر حامد کرزي تېره اوونۍ ویلي وو چې د سولې د بهیر پیاوړي کولو لپاره به په قطر کې د طالبانو ددفتر د پرانیستلو ملاتړ وکړي.

له هغه يوه ورځ وروسته چې طالبانو په لومړي ځل له نړيوالو سره د دوى په وينا د افهام و تفهيم لپاره په قطر کې د دفتر پرانيستلو ته چمتووالى وښود، د افغانستان د ولسمشرۍ دفتر د امريکا او طالبانو ترمنځ د خبرو په باب څرگندونه وکړه.

د ولسمشرۍ دفتر رسنيو ته په لېږل شوې اعلاميه کې داسې ښيي چې گواکې د بهرنيو ځواکونو له خوا د بې گناه خلکو د وژنې مخنيوي ته د امريکا او طالبانو ترمنځ خبرې غوره دي او په همدې دليل يې دوى مني.

اعلاميه وايي : "د افغانستان اسلامي جمهوریت یو ځل بیا پر خپل همېشني دریځ ټینګار کوي چې خبرې اترې سولې ته د رسېدو، د جګړې د خاتمې او پر افغان رنځېدلي ملت باندې د تپل شوي له خشونته ډکې فضا څخه د را وتلو یوازينۍ لاره ده ."

دوى دا هم وايي چې له کلونو را په دې خوا په تکرار سره دا دوى په ډاګه کړې ده چې د ترهګرۍ پرخلاف د جګړې اصلي علتونه د افغانستان د خلکو په کورونو او کلیو کې نشته، نو ځکه دغه جګړه نه شي کولای د افغانانو پر کورونو باندې د بریدونو په کولو سره بري ته ورسیږي.

اعلاميه په قطر کې د طالبانو د دفتر پرانيستلو پر وړانديز او له امريکا سره د طالبانو د خبرو په هرکلي کې وايي :

" افغانستان د امریکا د متحده ایالاتو او طالبانو تر منځ د مذاکرې په اړه چې طالبانو ته به په قطر کې د دفتر په جوړېدو منتج شي، موافق دی تر څو چې زموږ بې ګناه خلک د بهرنیانو او د هغوی د اعمالو له هغو پلمو څخه نجات پیدا کړي چې دوی یې د افغانانو د وژلو او وینې تویولو لپاره کاروي."

د امریکا د بهرنیو چارو وزارت ویاندې ویکتوریا نولند د طالبانو د سه شنبه د ورځې د خبر پاڼه په باب وويل چې سره له دې چې متحده ایالتونو په دې اړه کوم رسمي خبر نه دی ترلاسه کړی، خو که د دغه دفتر پرانیستل د افغانانو په مشرۍ او ملاتړ د بهیر یوه برخه وي، او افغان حکومت فکر وکړي چې رغنده رول لوبولی شي، او کوربه هېواد یې ملاتړ کوي، نو موږ به چمتو یو چې په دې کې یو رول ولوبوو.

ورته مطالب