له امريکا سره د همکاريو افغان تړون لاسليک ته چمتو شو

کرزی او اوباما د انځور حقوق AP
Image caption دواړو غاړو نژدې يو نيم کال د دغه سند پر لارو چارو خبرې وکړې.

د متحدو ايالاتو او افغان حکومت پلاوو له امريکا سره د همکاريو د ستراتيژيک تړون پر ټولو برخو جوړ جاړى وکړ او وايي اوس د لاسليک لپاره چمتو دى.

پر تړون به د دواړو هيوادونو ولسمشران لاسليک کوي خو تر هغه وړاندې بايد د دواړو ملي شوراوې هم پرې سلا شوې وي.

له پلان سره سم به د دوشنبه په ورځ ( د اپريل ٢٣) د افغانستان د ملي امنيت شورا مشر رنګين دادفر سپنتا د دې سند په اړه ملي شوراته معلومات وړاندې کړي.

د امريکا په استازيتوب په کابل کې د هغه هيواد سفير د دغه سند لپاره د اوږدو خبرو په باب وويل:

" ما په ډيرو خبرو اترو کې برخه اخيستې ده خو بې له شکه چې له افغانانو سره په دې موضوع بحثونه او خبرې خورا سختې وې."

دواړو غاړو نژدې يو نيم کال د دغه سند پر لارو چارو خبرې وکړې.

د سند د نسخو د سپارلو پر وخت په لنډو خبرو کې د افغانستان په استازيتوب ډاکټر سپنتا وويل:

"دا سند چې نن بشپړ شو د افغانستان د امنيت، د سيمې او نړۍ د امنيت لپاره کلک بنسټ جوړوي او دا سند د سيمې د پرمختيا لپاره دى."

له امريکا سره د ستراتيژيکو اړيکو او د دولت له وسله والو مخالفينو سره د خبرو پر ميکانېزم د مشورو په موخه، دوديزه لويه جرګه د ١٣٩٠ لمريز کال د لړم په ٢٥مه، په کابل کې جوړه شوې وه، چې څلور ورځې يې دوام وکړ.

دغې جرګې د امريکا له متحدو ايالتونو سره د ستراتيژيکو همکاريو د سند لاسليک کول په مشروط ډول ومنل.

د افغانستان ملي حاکميت، خپلواکۍ او ځمکنۍ بشپړتيا او اسلامي او افغاني ارزښتونو، ته درناوی او د شپې له مخې د خلکو د کورونو د تلاشيو او عمليات بندول د يادې جرګې له مهمو شرطونه وو.

ددغه سند د لاسليک پر وړاندې دوه عمده خنډونه ،چې يو يې د بهرنيو ځواکونو له خوا د شپې له خوا عملياتو بندېدل او د هغو افغاني کول او بل يې افغانانو ته په افغانستان کې د بهرنيو ځواکونو د زندانونو د مسووليت سپارل و.

له ډيرو بحثونو وروسته دغه دواړه چارې افغاني شوې او رسماً په دې اړه د يادو هېوادونو د چارواکيو له خوا هوکړه ليکونه لاسليک شول.

ورته مطالب