د فراه ولايت د والي پر دفتر ځانمرگو بريد کړى دى

فراه د انځور حقوق BBC World Service
Image caption د ځايي چارواکو په وينا والي او نورو چارواکي رک روغ پاتې دي

د افغانستان د لويديځ ولايت فراه د والي پر دفتر د وسلوالو کسانو بريد د پنځو پوليسو او بريد کوونکو په وژل کېدا او د دوو ملکي کسانو په ګډون د ١٥ تنو په ټپي کېدو پاى ته رسيدلى دى.

وسلوال کسان چې د عيني شاهدانو په وينا د سرحدي پوليسو جامې يې پر تن وې، د پنجشنبې په ورځ( د مۍ ١٧مه) د فراه ولايت پر ودانۍ بريد وکړ.

ځايي چارواکو رسنيو ته ويلي چې د بريد کوونکو شمېر معلوم نه دى خو د دروازې د دوو ساتونکو له وژلو وروسته د ولايت ودانۍ ته ننوتل او دوو کسانو يې ځانونه والوځول.

درېيم ځانمرګى بريد کوونکى د ولايت ودانۍ په زينه کې د لاسي بم له الوځولو وروسته د والي خونې ته ننوت، خو د شته کسانو له خوا ځاى پر ځاى ووژل شو.

جګړه ظاهراً پاى ته رسېدلې ده، خو پوليس او اردو د سيمې په پلټنه بوخت دي.

په دې پېښه کې د فراه والي ته چې د بالابلوک ولسوالۍ له سپين ږيرو سره د بريد پر وخت په غونډه بوخت و زيان نه دى اوښتى.

په فراه کې د روغتون مسوولين وايي چې روغتون ته د ټپيانو وروړل دوام لري او کېداى شي شمېره يې زياته شي.

وسله والو طالبانو د دې بريد پړه منلې ده.

ورته مطالب