د لغمان ديني پوهانو د طالب ضد پاڅون ننګه کړې

طالبان
Image caption تر دې وړاندې په غزني او پکتيا ولايتونو کې هم د طالبانو پر ضد ولسي پاڅون شوی دی.

د افغانستان د ختيځ لغمان چارواکي وايي د دغه ولايت د دولت شاه ولسوالۍ لسګونه ديني پوهانو د يوې غونډې په ترڅ کې د طالبانو پر وړاندې د ولسي پاڅون ننګه کړې ده.

ځايي چارواکي وايي په دولت شاه کې دغه ولسي پاڅون څو ورځې وړاندې ځايي خلکو د حکومت د مخالفو وسله والو پر وړاندې پېل کړ.

د ولايتي ادارې له لوري رسنيو ته په يوه ليږل شوې ويډو کې لسګونه هغه کسان ښوول کېږي چې د حکومت په ملاتړ د وسله طالبانو پرضد غږيږي.

دغه کسان چې په يوه جومات کې را ټول شوي، د وسله والو طالبانو کړنې غندي او هغوى ته سپکې سپورې وايي.

شاوخوا پنځه ورځې وړاندې د لغمان په اليشنګ ولسوالۍ کې هم لسګونو تنو په يوه لاريون کې د وسله والو طالبانو پر وړاندې، ورته يوه اقدام کې، له هغوی سره مخالفت وښود.

وسله والو طالبانو په خپل لومړي غبرګون کې دوی قومي اربکي وبلل.

د وسله والو طالبانو يو وياند زبيح الله مجاهد رسنيو ته ويلي چې، دوی د حکومت په هڅونه راپاڅيدلي، او په وينا يې شمېر يې هم ډېر کم دى.

دغه طالب وياند ويلي طالبانو د حکومت پر وړاندې پاڅون کړى او د پاڅون پروړاندې بل پاڅون مانا نه لري.

تر دې وړاندې د افغانستان په يو شمېر نورو ولايتونو کې هم ورته پاڅونونه شوي، خو طالبان یې دومره جدی نه بولي.

ورته مطالب