د سیمټو واردوونکو ټولنه جوړه کړه

د خپريدو وخت: 13:38 گرینویچ - چارشنبه 03 اکتوبر 2012 - 12 تله 1391
ciment

افغانستان ته ډېری سیمټ له پاکستان او ایران څخه راواردیږي، چې یوه اندازه له دغه هېواده بیا د منځنۍ اسیا هېوادونو ته هم لېږدول کېږي.

په کابل کې د سیمټو واردوونکو سوداګرو دوی ته په مالي او ګمرکي برخه کې د ورپېښو ستونزو د اورولو لپاره یوه ټولنه جوړه کړه.

دغه سوداګر وايي، د مالیو، تلو او ګمرکونو په برخه کې له ستونزو سره مخ دي، چې د دغې ټولنې پر مټ به یې د اوارولو ګډې هڅې کوي.

د افغانستان د سوداګرۍ خونه وايي، دغه ټولنه به د سوداګرو د ستونزو په اوارولو کې د مرستې تر څنګ هېواد ته د خرابو سیمټو د رالېږدېدو مخه هم ونیسي.

په دې ټولنه کې شاوخوا ۵۰ سوداګر غړیتوب لري، چې ډېری یې له پاکستانه سیمټ راواردوي او په افغانستان کې د خرڅلاو تر څنګ یې د منځنۍ اسیا هېوادونو ته هم لېږدوي.

د افغانستان د سوداګرۍ خونه وايي، دغه ټولنه له دوی سره ثبت شوې او نن په رسمي ډول پرانستل شوه. د دغې خونې مرستیال خانجان الکوزي د یادې ټولنې په پرانستې غونډه کې ګډون کړی و.

ده وویل، دا بنسټ به د سوداګرو د ستونزو اوارولو لپاره د دوی استازيتوب کوي او هېواد ته به د ټيټ کیفیتو سیمټو د واردېدو مخه ونیسي.

سوداګر شکایت کوي، چې له دولت سره د مالیو، تلو او ګمرکونو په برخه کې ستونزې لري او له همدې امله د دې ټولنې جوړولو ته اړ شول.

د سیمټو د واردوونکو ټولنې مشر حاجي سنګر ساپی وايي، سوداګرو د ورپېښو ستونزو د ګډ اواري لپاره د دغې ټولنې جوړولو ته وپتیېله.

له تېرې یوې لسیزې راهیسې په افغانستان کې د ودانیزو چارو د چټکتیا او پرمختیا له امله دغه هېواد ته له بهره راتلونکو سیمټو کې هم پام وړ ډېروالی راغلی دی.

د سوداګرۍ خونه وايي، افغانستان ته ډېری سیمټ له پاکستان او ایران څخه راواردیږي، چې یوه اندازه له دغه هېواده بیا د منځنۍ اسیا هېوادونو ته هم لېږدول کېږي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .