پښتو شاعر او ژورناليست حنيف بکتاش ومړ

د خپريدو وخت: 13:03 گرینویچ - پنجشنبه 04 اکتوبر 2012 - 13 تله 1391

بکتاش په ١٩٦١ کال کې په ميدان وردگو ولايت کې زېږيدلى و.

د پښتو ژبې شاعر، ژورناليست او تاريخ پوه حنيف بکتاش په لندن کې د ور پېښې ناروغۍ له امله د پنجشنبې په ورځ (د اکتوبر/ څلورمه) ومړ.

حنيف بکتاش چې د بي بي سي پښتو څانگې د مرغلرو امېل په خپرونه کې د هلمند په نامۀ کلونه کلونه په کار بوخت و، د ازاد يا سپين شعر په ويلو د پښتو شعر ويونکو په کتار کې ښه نوم گټلى و.

بکتاش په ١٩٦١ کال کې په ميدان وردگو ولايت کې زېږيدلى و.

په افغانستان کې د پوهنتون تر بشپړاوي وروسته حنيف بکتاش په پخواني شوروي اتحاد کې د دوکتورا سند واخيست.

حنيف بکتاش په پښتو او دري ژبو يو شمېر کتابونه ليکلي او خپارۀ کړي دي.

" د ځنگله سترگو کې" د حنيف بکتاش د شعرونو لومړنۍ ټولگه وه چې په ١٩٨٧ کال کې په کابل کې خپره شوه.

په ٢٠٠٩ کال کې د دۀ وروستۍ شعري ټولگه " کله چې لمر د خداى ايتونه لولي" په نامۀ چاپ شوه.

د حنيف بکتاش يو له وروستيو شعرونو چې خپل زوى ته يې ليکلى و "پر ما مه ژاړۀ" نومېدۀ:

پامیــــرته چې نه یوازې زوی مې بلکې ملګری، مې هم دی

کله چې، د شمال وږمو
د مور للو، للو
ستا غوږته رسوله
ته،
د یوې لویې ونې
تر سیوري لاندې زنګېدې.

کله چې اوښکې
زموږ پر مخ وچېدې
ستا خندا لا جاري وه
پر ما مه ژاړه
زه له تانه،
د مسکا هیله لرم
پخوانۍ سندرې
له سره پیل کېږي
په آسمان کې
د الماسو زړي کرل شوي
او سپوږمۍ بیا راځي
لا تر اوسه هم
د شمال وږمې، کولای شي
مسکا وشیندي
او د شپیلۍ آواز
د مینې انځور و باسي
او لا تر اوسه هم

ستا خندا
موږ سره رانغاړي
خو ګوره
که څوک
ستا د سترګو وړاندې هم
دغه لویه ونه
په سکروټو کې را ونغاړي
لابه ووایم
چې، ستا سره یم.
غواړم یو کوچنی جام
ستا په نوم پورته کړم
پر ما مه ژاړه
پخوانۍ کیسې
زموږ د ژوند یوه برخه ده
خو زه یې
ستا د نن او سبا لپاره څکم.

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .