نورستان کې "پولیسو" بانک لوټلی

د خپريدو وخت: 18:43 گرینویچ - شنبه‬ 17 نومبر 2012 - 27 لړم 1391

په نورستان کې د پوليسو لخوا د بانک لوټل به ښايي په دې ورستيو کې د خپل ډول لومړنۍ پېښه وي.

په نورستان کې څو تنو پوليسو د افغانستان بانک له يوې ځايي څانګې پيسې غلا کړي دي.

له بانک نه د غلا شویو پيسو ټول شمېر نه دى معلوم خو د نورستان د پوليسو چارواکي وايي له غلو پوليسو ېې دوه د شاوخوا ۱۱ ميليونه افغانيو سره بېرته نيولي دي.

چارواکي وايي تېره شپه هغو پوليسو چې د نورستان په مرکز پارون کې ېې د افغانستان بانک په يوه څانګه څوکۍ کوله له بانکه ميلیونونه افغانۍ پټې کړي او تښتېدلي دي.

د نورستان د پوليسو مشر غلام الله نورستانى وايي له درې پهردارو پوليسو ېې، چې پيسې ېې وړي دوه تنه د کانتيوا په سيمه کې د يو څه پيسو سره بېرته نيولي او د دريم کس د موندنې لپاره شاوخوا ۲۰۰ پوليس سيمې ته ورغلي دي.

تر اوسه نه ده روښانه چې له بانکه ټولې څومره روپۍ پوليسو غلا کړي، خو ويل کېږي چې بېرته د ترلاسه شویو پيسو به ډېرې نه وي.

د دغه غلا د ټولو جزياتو د موندلو لپاره يو پلاوى هم ټاکل شوى چې معلومه کړي پوليسو په يوازې سر بانک لوټلى او که د بانک د مامورينو هم ورسره لاس دى.

دا لا نه ده روښانه چې غلا شوې پيسې هسې په ډاګه پرتې وې او که اوسپنيزې المارۍ پسې ماتې شوي دي.

په نورستان کې د پوليسو لخوا د بانک لوټل به ښايي په دې ورستيو کې د خپل ډول لومړنۍ پېښه وي.

تر دې وړاندې په نورستان کې پوليسو ته د معاشونو نه ورکړې يوه رسوايي جوړه کړې وه.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .