کرزي له "جهادي مشرانو" سره پر طالب دفتر خبرې وکړې

د خپريدو وخت: 14:36 گرینویچ - چارشنبه 26 ډسمبر 2012 - 06 مرغومی 1391

دا لا جوته نه ده چې ولسمشر کرزى کله واشنگټن ته سفر کوي.

د افغانستان د ولسمشر حامد کرزي په مشرۍ د ولسمشرۍ په دفتر کې د چارشنبې په ورځ ( د دسمبر ٢٦ مه) د يو شمېر هغو کسانو غونډه جوړه شوې وه چې افغان چارواکي يې " جهادي مشران" بولي.

د ولسمشرۍ دفتر وايي په دې غونډه کې د امریکا متحده ایالاتو ته د ولسمشر حامد کرزي د راتلونکي سفر او د سولې په اړه په قطر کې د طالبانو د دفتر په هکله خبرې وشوې.

د چارواکو په وينا حامد کرزي له د امريکا له ولسمشر بارک اوباما سره د راتلونکې ليدنې د اجنډا ټکي د غونډې ګډونوالو ته وړاندې کړل.

د ولسمشرۍ دفتر وايي "له هر اړخیز بحث وروسته د غونډې برخه والو مشوره ورکړه چې د افغانستان حکومت دې د ملي حاکمیت او ملي ګټو په چوکاټ کې د امریکا له متحده ایالاتو سره دا مذاکرات ترسره کړي."

دا لا جوته نه ده چې ولسمشر کرزى کله واشنگټن ته سفر کوي.

په دې وروستيو کې د ښاغليو کرزي او اوباما په يوۀ تيلې فوني تماس کې پتېيل شوې وه چې افغان ولسمشر به واشنگټن ته سفر کوي.

د سولې د بهیر او په قطر کې د طالبانو لپاره د دفتر په اړه د ولسمشر کرزي په مشرۍ شوې دغې غونډې پرېکړه وکړه چې دا بهیر دې د افغان دولت او د سولې د عالي شورا تر مشرۍ لاندې پر مخ یوړل شي.

د افغانستان د بهرنيو چارو وزارت په روانه اوونۍ کې ويلي و چې له طالبانو سره د خبرو چارې بايد د کابل په مشوره وشي او د افغان چارواکو له ښکېلتيا پرته دوى دغه ډول هڅې نه مني.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .