پښتون ژورنالست او لیکوال غلام محمد زرملوال ومړ

د خپريدو وخت: 14:56 گرینویچ - 20 جنوري 2013 - 01 سلواغه 1391

نوموړي تر هغه چې توان بې کېده، د جاري تحولاتو په اړه په ټولنیزو غونډو کې حضور درلود.

نومیالی افغان لیکوال، ژورنالست او ټولنیز شخصیت غلام محمد زرملوال د ورپېښې ناروغۍ له امله تېره شپه په لندن کې وفات شو.

د اروښاد مېرمن وايي د نوموړي جنازه به افغانستان ته لېږدوي.

دې د ښاغلي زرملوال په اړه وویل که څه هم ناروغ و خو "له سهاره تر ماښامه يې یوازې د افغانستان په اړه فکر کاوه".

ارواښاد زرملوال کلونه د بي بي سي له لارې د افغان ژورنالیزم په برخه کې کار وکړ چې د خپل ولس غږ به یې تر نورو رساوه.

نوموړي د ژورنالیزم ترڅنګ د بېلابېلو سیاسي، ټولنیزو او علمي موضوع ګانو په اړه کتابونه او لیکنې کړې وې.

ارواښاد زرملوال په دې وروستیو کې سره له دې چې سخت ناروغ و، ''د پېریانو جګړه'' او ''د بنګله دېش بې ستري'' په نامه دوه کتابونه يې پښتو ته وژباړل.

نوموړي تر هغه چې توان يې درلود، د جاري تحولاتو په اړه په ټولنیزو غونډو کې حضور درلود.

د زرملوال ژوند

د زرملوال صاحب یوه ځانګړتیا دا وه چې سیاسي لیکنې به یې کولې او د سیمې د حالاتو نه به تل ډېر با خبره و.

زرملوال صاحب چې به په بي بي سي خپرونه کوله نو د اورېدونکو ټول لیکونه به یې لوستل او ویل به یې چې دا لیکونه د ولس غږ دی نو موږ باید ورته ډېر پام وکړو.

په ولس کې د سیاسي ویښتابه ترڅنګ نوموړی د ژبې د ودې او سمسورتیا په برخه کې هم تل فعال و.

د سیاسي لیکنو په برخه کې ''افغانستان تر وروستي افغانه' نومی اثر د نوموړي د همدغو هڅو یوه غوره بېلګه ده.

ارواښاد زرملوال له بي بي سي سره د خپل اوږدمهاله کار په بهیر کې تر لاسه کړې علمي تجربه د ژوند تر وروستیو شېبو په پرله پسې توګه خپلو هېوادوالو ته لېږدوله.

ډاکټر ببري ګل وزیر چې د ارواښاد زرملوال له دوستانو او همکارانو دی بي بي سي پښتو ته وویل چې زرملوال یې شاو خوا شل کاله پيژانده.

ښاغلی وزیر وایي زرملوال په وطن مین سړی و.

ده یوازې د افغانستان په اړه نه بلکې د سیمې په اړه ژوره معلومات لرل او تل به یې په اړه لیکنې او بحثونه کول.

ښاغلي وزیر زیاته کړه کله چې په افغانستان کې د ډاکتر نجیب الله حکومت ړنګ شو نو ښاغلي زرملوال د هېواد دننه او بهر د خپلو خلکو او د افغانستان د شتمنیو د خونديتوب په اړه ژوره اندېښنه درلوده او په دې لړ کې به یې عملي هلې ځلې کولې.

ببري ګل وزیر وایي تل به مو یو بل ته کتابونه سره لېږل او نظریات به مو سره شریکول.

اوس هم چې موږ له ببري ګل وزیر سره خبرې کولې د ښاغلي زرملوال درې کتابونه ورته مخکې پراته وو. احمدشاه ابدالي جرګه، ارګ یا مرګ او په افغانستان کې سوله کله او څنګه منځ ته راتللی شي؟

ببري ګل وايي هغه خبره چې تل به یې کوله دا وه چې باید په افغانستان کې داسې حکومت راشي چې د ټولو قومونو او خلکو استازیتوب وکړي.

ببري ګل وزیر وایی د احمدشاه بابا دا شعر به یې تل راته وایه.

ځان به ويښ کړو هرې خواته، هرې خواته رقیبان دي

یوپه بل مو سره وژني وایی خپل یو غلیمان دي


بي بي سي پښتو فېسبوک کې د اوریدونکو خاطرې

محمد افضل

د ښاغلي زرملوال صاحب ډېر اثار مې لوستي دي. هر لیکنه او کتاب به دی تر ډېره ژوندی وساتي او په دی هیله چې د ښاغلي زرملوال صاحب راتلونکي نسلونه زرملوال شي.

د نورو کتابونو سره سره د زرملوال صاحب له مهاجر تر مجاهد یو ډېر په زړه پورې کتاب دی چې د جهادی تنظمونو له سي ای ای او ای اس ای او نور عربي استخباراتو او همدارنګه بعضې کومنستي تنظمونه په کی ښکاره شوي دي.

ارغند عبدالمنان

کله چې د افغانستان په سهيلي ولايت اروزګان کې د بې بې سي خبريال احمد اميد خپلواک شهيد شو نو په هماغه ورځ مازيګر يې ما ته زنګ را ووهه. دا چې د هغه کورنۍ ته يې لاس رسى نه درلود، د هغه د مړيني له امله يې زما څخه معلومات وغوښتل او ډېره غمرازي يې وکړه.

هغه تر درې ځلي زيات را ته وويل چې پر ځان پام کوه هسي نه چې د جګړي خوراک شي.

"باید په افغانستان کې داسې حکومت راشي چې د ټولو قومونو او خلکو استازیتوب وکړي"

زرملوال

زما به يې دا خبره تل په ياد وي چې د افغانستان لپاره کار وکړه، دا ملک د ځوانانو کار ته اړتيا لري.

عبدالمتین رحیمي

مرحوم زر ملوال صاحب سره مې په ۲۰۱۱ کال کې په یوه كنفرانس کې گډون کړی وو. هغه به وويل پښتانه بأيد د نوم او گوند په نامه سره جلا نه شي.

د لیکوالونو او ژورنالستانو خاطرې

ادم خان سیرت

تېرکال چې زرملوال صیب کابل ته راغلی و د پښتو په یوه غونډه کې یو پښتون جنرال ورته وویل چې زرملوال صیب هوا چټله ده چې ناروغي دي زیاته نه شي.

هغه ورته په ځواب کې وویل چې دهوا دککړوالي له امله نه ناروغه کېږم خو د خرابو او منفي ذهنیتونو له امله شاید ناروغ شم. مرحوم زر ملوال صاحب سره مې په ۲۰۱۱ کال کې په یوه كنفرانس کې گډون کړی وو. هغه به وويل پښتانه بأيد د نوم او گوند په نامه سره جلا نه شي.

میوند خان
بابا (زرملوال صاحب) سره مې اړیکه وه، کله ناکله به مو یو بل ته ټیلیفون کاوه. یوه سهار یې راته ټیلیفون وکړو او راته يې وویل چې لوی افغانستان د مبارک شه، تر مرګالی دی وطن خپل دی. څو ورځې وړاندې بابا ناروغه و ټیلیفون کې مې ورسره خبرې وکړې راته یې وویل کورته درځم او څه کار در سپارم. ژوند وفا ونه کړه او پوه نه شو چې څه کار یې را سپاره؟

د دې پوښتنې ځواب به تر ابده تر لاسه نه کړم.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .