"د دينې پوهانو غونډه د ناڅرګندو لاملونو له مخې ځنډېدلې"

د خپريدو وخت: 21:02 گرینویچ - 27 جنوري 2013 - 08 سلواغه 1391

د ديني پوهانو او عالمانو د غونډې وړانديز اسلام اباد ته د افغانستان سولې شورا پلاوي د سفر پر مهال کوربه هېواد کړی و

د افغانستان سولې شورا ويلي د افغانستان او پاکستان د ديني پوهانو غونډه د يو شمېر ناڅرگندو لاملونو له مخې ځنډېدلې ده.

د دغې غونډې وړانديز پاکستان درې مياشتې مخکې کړى و، او اجنډا کې يې په پام کې نيول شوې وه، چې د دواړو هېوادونو ديني پوهان به د افغانستان جگړه او ځانمرگي بريدونه د اسلامي حکومونو په رڼا کې څېړي.

دواړو خواوو پر دې هم هوکړه کړې وه، چې له دغې غونډې وروسته به د همدې موضوع د څېړلو په موخه د ديني پوهانو نړيواله غونډه جوړوي، چې هغه هم تر اوسه نه ده شوې.

د افغانستان سولې عالي شورا وايي د دواړو هېوادونو د ديني پوهانو او عالمانو د غونډې وړانديز اسلام اباد ته د افغانستان د بهرنيو چارو وزير او د دغه هېواد د سولې شورا پلاوي د سفر پر مهال کوربه هېواد کړی و.

د سولې عالي شورا د بهرنيو اړيکو سلاکار محمد اسماعيل قاسميار وايي هوکړه داسې شوې وه چې په دغه غونډه کې به د دواړو هېوادونو ديني پوهان د افغانستان روانه جگړه او ځانمرگي بريدونه د اسلام د حکمونو په رڼا کې څېړي چې په وينا يې د دواړو هېوادونو د ولسونو د ذهني روڼتيا او سولې ټينگېدو لامل وگرځي، خو د غونډې ځاى نه و په گوته شوى.

ياده شوې شورا په دې اړه اندېښنه ښيي چې د دريو مياشتو په تېريدو بيا هم پاکستان د دغه هوکړې عملي کولو ته نه دی چمتو شوی.

ښاغلي قاسميار وويل ښايي د دغې غونډې د ځنډ لامل "د پاکستان يو شمېر ستونزې او يا هم د وسلوالو طالبانو اعلاميه" وي، چې له ديني پوهانو يې په کې د نه گډون غوښتنه کړې وه.

ښاغلي قاسميار وويل که دا غونډه جوړه شي، ډېره شونې ده چې د دواړو هېوادونو پر امنيت گټور اغېز وکړي.

د سولې عالي شورا وايي د افغانستان او پاکستان د ديني پوهانو غونډه په همدې اړه د نړيوالې غونډې درشل بلل شوی و.

په پام کې وه چې په نړيواله غونډه کې د افغانستان، پاکستان، ايران، تاجکستان، سعودي، هند او يو شمېر نورو هېوادونو ديني عالمانو برخه اخيستې وی.

خو تر ټاکلې نېټې شاوخوا درې مياشتې وروسته هم پاکستان نه دی توانېدلی چې خپله ژمنه پوره کړي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .