'له افغان ښځو سره تاوتریخوالی ''نه دی کم شوی''

Image caption د بښنې نړیوال سازمان وايي افغان مېرمنې خپلو کورنيو کې هم له تاوتريخوالي سره مخامخې کېږي

د بښنې نړيوال سازمان افغان حکومت تورن کړى، چې د ښځو پر وړاندې د تاوتريخوالي په مخنيوي کې پاتې راغلى دى.

د سازمان دا وروستۍ څرگندونې يوه اونۍ له هغه وروسته راځي چې د بادغيس په ولايت کې يوه ځوانه ښځه د خپلې کورنۍ د بې عزتۍ په نامه د کلي د ملايانو له لوري په مرگ محکوم شوه چې وروسته د شاوخوا درې سوه کليوالو په حضور کې ووژل شو ه.

اتلس يا نولس کلنه حليمه له دوو ماشومانو سره د بادغيس په ولايت کې واده شوه .

کله چې مېړه يې په ايران کې و، تورنه شوه ،چې د خپل تره له زوى سره له کوره تښتېدلې ده .

لس ورځو وروسته د تره زوى يې دا بېرته کورته راوستله او خپله ورک شو .

حليمه د خپلې کورنۍ پر بې عزتۍ محکومه شوه او د کلي دريو ملايانو په عام محضر کې د هغې د وژلو فتوا ورکړه .

يوه اونۍ وړاندې پلار يې د څو سوه کليوالو په حضور کې حليمه په ټوپک وويشتله او ويې وژله .

د بخښنې نړيوال سازمان د افغان مېرمنو پر وړاندې د تاوتريخوالي د ډېريدا د يوې وروستۍ نښې په توگه د بادغيس ولايت د دغې مېرمنې قضيې ته اشاره کړې ده .

سازمان وايي افغان مېرمنې خپلو کورنيو کې هم له تاوتريخوالي سره مخامخې کېږي، وهلې کېږي، رنگ رنگ فزيکي سزاگانې ورکول کېږي او د سيمه ييزو شوراگانو او سپين ږيرو له لوري حتى په مرگ محکومې کېږي .

په افغانستان کې د بشري حقونو نړيوال سازمان د تېر کال په اوومياشتو کې د ښځو په وړاندې د تاوتريخوالي څلور زره قضيې ثبتې کړي دي چې دا د تېرکال د همدې مودې په پرتله دېرش سلنه ډېروالى ښيي .

ورته مطالب