د سپین بولدک دروازه کې ځانمرګی برید شوی

د سپین بولدک سرحدي دروازه
Image caption د ۲۰۱۳ د جنوري په میاشت کې په ددو ځانمرګو بریدونو کې پنځه ولسي وګړي وژل شوي او د درېیو پولیسو په ګډون ۱۵ نور ټپیان شوي وو.

د کندهار سیمه ییز چارواکي وایي یوه ځانمرګي برید لږترلږه د سرحدي پولیسو د قومندان په ګډون دوه تنه وژلي او اته نور یې ټپیان کړي.

په ټپیانو کې دوه پولیس دي.

کندهار کې سیمه ییز خبریال مامون درانی وايي، ددغه ولایت د والي ویاند جاوید فیصل ویلي، چې برید نن سهار شاوخوا نهه نیمې بجې د سپین بولدک ولسوالۍ او د پاکستان د چمن ښار ترمنځ په سرحدي دروازه کې شوی.

ښاغلی فیصل وایي چې په دغه ځانوژونکي برید کې د اختر محمد په نوم د افغان سرحدي ځواکونو یو قومندان او یو ولسي وګړی وژل شوي.

نوموړی زیاتوي چې بریدګر پلی و او ادعا کوي چې د پولې له هغې غاړې پاکستانه راوښتی و.

په سیمه کې عیني شاهدان وایي چې په دغه ځانمرګي برید کې د پاکستان پنځه تنه سرحدي پولیس هم ټپیان شوي، خو د کندهار سیمه ییز چارواکي یې په اړه ناخبري ښيي.

طالبان

وسله وال طالبانو ددغه برید مسولیت منلی.

طالب ویاند قاري یوسف احمدي وایي چې په دغه برید کې د اختر محمد په ګډون ټول وژل شوې او ټپیان افغان سرحدي پولیس دي.

خو همدغه طالب ویاند لږ وروسته وویل، چې د دوی معلومات نیمګړي وو او دا به مالومه کړي، چې ایا دا ځانمرګی برید و او که چاودنه.

تر چاودنې وروسته د سپین بولدک په بشپړه توګه تړل شوی او له چاودنې سره سم د دواړو هېوادونو پوله ساتونکو او امنیتي کسانو په مورچو کې چمتووالی نیولی.

د چاودنې یوه عیني شاهد ویلي، د پېښې پرمهال له پولې دواړو غاړو ته خلک د اوښتو په حال کې وو.

د افغانستان او پاکستان ترمنځ د چمن له سرحدي سیمې د ناټو ځواکونو اکمالات راوړل کېدل.

د شمېرو له مخې، د چمن له سرحده هره ورځ دواړو غاړو ته نژدې شل زره کسان تګ-راتګ کوي.

دا د روان ۲۰۱۳ کال له پیله سپین بولدک کې دویم ځانمرګې برید دی.

د ۲۰۱۳ د جنوري په میاشت کې په ددو ځانمرګو بریدونو کې پنځه ولسي وګړي وژل شوي او د درېیو پولیسو په ګډون ۱۵ نور ټپیان شوي وو.

ورته مطالب