زابل کې وسله والو ۶ کسه له تښتولو وروسته وژلي

Image caption دغه شپږ جسدونه د زابل د مرکز په ترنک سيمه کې موندل شوي دي

د افغانستان د سویلي ولايت زابل مرستیال والي محمد جان رسولیار وایي، وسلوالو طالبانو هغه شپږ تنه چې څو اوونۍ وړاندې د کندهار- کابل د لويې لارې په اوږدو کې تښتولي وو، وژلي دي.

ښاغلی رسولیار وایي، د دغو کسانو جسدونه تیره شپه (سه شنبې) د کلات ښار اړوند د ترنک په سيمه کې په داسې حال کې موندل شوي چې د توپک په ګولیو وژل شوي دي.

د زابل د ځايي چارواکو دغه ادعا چې دغه کسان وسله والو طالبانو وژلي، په خپلواک ډول نه ده تاييد شوې.

د زابل امنیتي چارواکي وایي وسلوالو کسانو ښایي دغه کسان په دې تور چې ګواکې افغان پوځیان دي وژلې وي.

د دغه ولایت د امنیت آمر غلام جیلاني فراهي وایي چې د وژل شويو کسانو مړي دمګړۍ په روغتون کې دي.

دوی وايي دا لا نه ده روښانه، چې وژل شوي څوک او د کوم ولایت اوسیدونکي دي.

وسلوالو طالبانو تر اوسه ددغې پیښې په اړه څه نه دي ویلي.

دا لومړی ځل نه دی چې د افغانستان په سویل کې دا ډول پېښې رامنځته کېږي.

تر دې وړاندې هم څو ځله دا ډول پېښې شوي او ځايي چارواکو يې پړه پر وسله والو طالبانو اچولې ده.

ورته مطالب