امريکا سره امنيتي تړون لويې جرگې ته چمتو شوی

Image caption اېمل فيضي وايي د تړون پښتو او دري ژباړې بشپړې شوې دي

کابل وايي له متحدو ايالاتو سره يې افغانستان امنيتي تړون چارې بشپړې شوې دي.

د افغانستان ولسمشرۍ ماڼۍ کې سرچينو د بي بي سي پښتو وېبپاڼې ته وويل دغه خبرې د چارشنبې په ورځ( د نومبر١٣) پاى ته ورسېدې.

اوس د تړون مسوده په پښتو او دري ژبو ژباړل کېږي چې د لويې جرگې استازي يې وويني او بحث پرې وکړي.

د افغانستان ولسمشر حامد کرزي وياند ايمل فيضي د بي بي سي پښتو وېبپاڼې ته وويل"د تړون پښتو او دري ژباړه بشپړه شوې او مطبعې ته لېږل کېږي چې د لويې جرگې لپاره تياره وي."

هيله دا ده چې راتلونکې اوونۍ به د شاوخوا ٣٠٠٠ ولسي استازو لويه جرگه په کابل کې سره کښيني چې پر دغه تړون غور وکړي.

د ولسمشر کرزي وياند ايمل فيضي وايي چې دوى واشنگټن ته د دغه تړون وروستۍ بڼه لېږلې ده.

د ښاغلي فيضي په وينا په تړون کې وروستۍ خبره له ٢٠١٤ کال وروسته په افغانستان کې د امريکايي پوځيانو د ماموريت پر څرنگوالي راڅرخېده.

ويل کيږي چې د شنبې پر ورځ ( د نومبر ١٦) به ولسمشر کرزى په کابل کې يوه خبري کانفرانس ته د وينا پر وخت پر دغه تړون او راتلونکې لويې جرگې خبرې وکړي.

د تړون پر متن له تېرو دوو کلونو راهيسې د کابل او واشنگټن ترمنځ خبرې کېدې.

په قطر کې د طالبانو د سياسي دفتر تر پرانيستو وروسته دغه خبرې د کابل له لورې وځنډول شوې.

خو په نا اعلان شوي ډول دغه خبرې بېرته پيل شوې او اوس اوس دواړه غاړې ظاهرآ په وروستي متن سره سلا شوې دي.

ورته مطالب