دوبنز: که امنيتي تړون نه وي سوله هم نشته

Image caption کابل او واشنگټن د امنيتي تړون د نه لاسليکېدا راهيسته پر يو بل ژبني وارونه ډير کړي دي.

د افغانستان او پاکستان لپاره د متحدو ايالاتو د ولسمشر ځانگړي استازي جيمز دوبنز له افغان ولسمشر حامد کرزي سره په خبرو کې د افغان چارواکو په وينا ويلي چې امنيتي تړون او افغان سوله سره تړلي دي.

يوه لوړ پوړي افغان چارواکي د بي بي سي پښتو وېبپاڼې ته وويل چې ښاغلي دوبنز د امنيتي تړون لاسليک له افغان سولې سره وتاړه.

دغه چارواکي د نوم نه ښوولو په شرط زياته کړه چې د ولسمشر اوباما ځانگړي استازي گواکې دا هم وويل چې " که په افغانستان کې سوله وي نو د دوى د عسکرو پاتې کېدو ته اړتيا نشته"

افغان چارواکي دا ادعا هم وکړه چې گواکې جيمز دوبنز ولسمشر کرزي ته دا هم ويلي چې د تړون د نه لاسليکېدا په حالت کې ښايي په افغانستان کې کورنۍ جگړه ونښلي.

چارواکو وويل چې افغان ولسمشر د دغو څرگندونو په ځواب کې په ډاگه کړه چې افغانستان کې که بهرنى لاس نه وي نو کورنۍ جگړه نه نښلي.

د پنجشنبې په ورځ ( د دسمبر ٥) د افغانستان د ولسمشرۍ دفتر د طالبانو د يوې خبرپاڼې په ځواب کې ويلي و چې " "طالبان وایي ترڅو امریکایان په افغانستان کې شته، دوی به جګړه کوي او امریکایانو له القاعدې او طالبانو سره جګړه د خپل حضور لپاره پلمه ګرځولې ده، خو د دغه ناوړه حالت او مرموزې جګړې بیه زموږ ملت ادا کوي.""

کابل کې د ولسمشرۍ دفتر وايي که دغه وروستۍ اعلامیه په رښتیا د طالبانو دريځ بیانوي او دوی په خپل دریځ کې د چارواکو په وينا ريښتيني او په عمل کې خپلواک وي، نو د سولې لارې په خپلولو سره دې په افغانستان کې د بهرنیانو د شته والي او د هغوی د جنګ د دوام لپاره پلمه ختمه کړي.

د افغانستان ولسمشرۍ دفتر د ولسمشر کرزي په باب وايي هغه په دې باور دی چې په اوسنيو حالاتو کې له لوېديځو هېوادونو او د امریکا له متحده ایالاتو سره اړيکې، په تېره په پوځي او اقتصادي برخو کې د هېواد په ګټه دي.

خو د افغان ولسمشرۍ په باور دا تړاو هغه وخت د افغانانو په خیر او ښېګڼه تمامېدى شي چې په افغانستان کې سوله او امنیت ټينګ شوى وي.

کابل او واشنگټن د امنيتي تړون د نه لاسليکېدا راهيسته پر يو بل ژبني وارونه ډير کړي دي.

د امريکا په رسنيو کې د چاراکو له خولې د جمعې په ورځ (د دسمبر شپږمه) ويل شوي وو چې که ولسمشر کرزى دا تړون لاسليک نه کړي نو بيلا بيل فشارونه به پرې ډير شي.

د وال سټريت جنرال ورځپاڼې د يوۀ ناڅرگند امريکايي چارواکي له خولې ويلي چې" پر ولسمشر کرزي فشار ډيريږي يوازې د ولس فشار نه دى بلکې د مهمو سياستوالو او د سوداگرۍ د ډگر مهم کسان پرې فشار اچوي."

ورځپاڼې د امريکايي چارواکي له خولې ويلي چې دغه ډول فشارونه به د واشنگټن تر فشارونو پر ولسمشر کرزي ډير اغېزمن او لوى وي.

خو د ولسمشر کرزي وياند ايمل فيضي د بي بي سي پښتو وېبپاڼې سره په خبرو کې دغه خبرې رد کړې او ويې ويل چې افغان مشر په کور دننه يا دباندې کوم فشار نه احساسوي.

ښاغلي فيضي وويل ولسمشر کرزى د افغانستان او افغانانو لپاره کار کوي او دريځ يې د ټول ولس دى.

ورته مطالب